Ka Lion Sports and Youth Affairs, Jowai ha ka 10 tarik uni u bnai da sdang ko yaka lympung yalehbol wa mar 6 ngut chiliang wa tip kam ka 6-A-Side Football Tournament 2023 ha madan biar Lion Mission Compound Dorbar Chnong hajrong ka thong u pynku yei kaam Sports neibhah najrong wa yarap ko u pynyoh yei doh i pran wa chait wa khlan, pynlait ko leh ya ki khon khynroo u ngat ha ki kaam sih wa boon jait.
Ya kani ka lympung yalehbol da wan wow wai ya ka da u Nibatskhem Marang kam u kongsan katwa u Soumitra Chakravarty (Advocate) won kam u symbood kongsan hei sakhilang kiwa chong chnong ka Lion Mission Compound wa kiwi.
U kongsan hawa klam da khut kyntu kyrsu u ya ki khon khynroo khyllood wow mih chimbynta ki ha ki kaam Sport wa kiwi de ki kaam wa e myntoi, wym toh u pynlut por hei khlem kaam neibhah ye ki u yahluti bakla hawa im i.
Heijooh i por kyntu u wow pynemkaam hok yei sap wa e u Blai wei u man leh ki bru wa kreh chitom khnang yow ku chakhmat.
Neibynta kiwa yalehke ha kani ka sngi won, kyntu u wow man kiwa lehke bha wei wymtoh leh u em ka mynsien yaamrem tangwa u chim kam ka laad wow ye u nang kreh chitom chaphrang.
Neiliang won u symbood kongsan hawa yaroh yaka Dorbar Chnong Lion Mission Compound, yooluti u leh wa kani ka lympung u pynmyntoi ko yaka chong ka thaw kamjooh ya kiwa ya chimbynta.
Ong haroh u wa i yalebol wym man ko du kam ka jait yalehke man ko leh kam chibynta i yoh yei kut yumut, i yakrehlang wa i pynkhlan yei mynsien.
Wei kam kiwa chimbynta toh u kynmoo haroh ki wa i em yong ki hapoh madan wym mut du neibynta ka liang wa mihkhmat ki, tangwa wot ya ki paidbah wa kyrchaan ya ki.
Chwa ini haka yalang wa pynlai da u Donkupar Syngkrem, President Lion Sports and Youth Affairs da yoh i puræ Bible wei i duwai na u Asst Waheh Chnong ka Lion Mission Compound, u Shlur Sumer.
Kam wow sdang ya kani ka lympung da pynman ar tylli ki yalehke heiwa ka Phiam FC da jop ko ya ka Ku Chaphrang da 3-1.
Ha ka yalehke wa ar hapyrdi ka Chaphrang United waka Golden Rise da rai ya kiwa jop deiwa yachut Tie-Breaker hadien wa ka yalehke da kut ko da 1-1 heiwa ka Chaphrang United da jop ko da 6-5.
