Ka lympung yalehbol wa tip kam ka 8th 7 A-Side Day & Night Football Tournament wa pynman da ka Mukhla Nongrim Sports Club Mukhla da wan wai ya ka da u Rening Sukhlain kam u kongsan ha ka 22 tarik uni u bnai ha madan Slot Masi.
Ya kani la lympung yalehbol da pynman biang hadien ar snem wa pynthut ka khlam COVID-19 wei da sakhi lang da u Waheh Chnong ka Mukhla Nongrim, u Buhlut Suna, u General Secretary ka Chnong, u Standbyme Sari chirup deiwa sakhilang ki khon ka chnong ka thaw wa ki dkhot yong ka Mukhla Nongrim Sports Club.
Ha kani ka sngi sdang neiliang u kongsan da pynlait paidbah u leh ya ki Ticket Lucky Draw yong ka Sports Club kam chibynta yow pynmih poisa neibynta ka Club.
Ha kani ka sngi da pynlai ya ka yalang da u Ryngkat Sari, President ka Sports Club wei da yoh ya ka bui krehkaam na u Firstly Sari, Secretary ka Sports Club, da yoh leh ya ki kyntien snieñ na u Secretary Chnong, u Waheh Chnong wei khaddooh da yoh ya i kyntien snieñ na u kongsan.
Ki liang wa da wan wow chibynta da em ki 32 tylli ki Sports Club kiwa napoh ka Ri-loom Jaiñtia wei da sdang da ka yalehke hapyrdi ka Mukhla Umlangshor Sports Club pyrchah ya ka Mookyniang Khliehtyrshi Sports Club heiwa ka Mukhla Umlangshor da jop ko deiwa yachut Tie-Breaker da 2-0.
Ya kani ka Tournament ha ka Semifinal wei kamjooh ha ka Final daw pynman ya ka dei miet ha madan Slot Masi hi, heiwa ya ka Final daw pynman ha ka 10-12-2022.
