Amlarem: Ka 7th Pdengshakap Secondary School Football Knock Out Tournament kawa da jooh pynman man u snem, da sdang biang yaka ha kani ka 14 tarik ha Madan Tympang Club Playground, Pdengshakap heiwa da wan wai pyrda ya kani ka Football Tournament da u MDC ka thaaiñ u Gillroy Tariang kam u kongsan, u Firstborn Manner kam u symbood kongsan hei emlang u Dolloi ka Elaka Stapator u Daman Lakashiang, ki dkhot ka Football Committee waka School Managing Committee, ki rangbah ka thaaiñ wa ki bru maya bol kiwa da wan wow sakhi lang.
U waheh chnong yong ka chnong Pdengshakap hawa e yei klam kam u Chairman yong ka Football Committee da ong u wa i pynman ya kani ka Tournament na iwi i snem cha kawi ka snem man ko kam chibynta wow pynmih poisa yaka skur wa pynlai da ka chnong, ka Pdengshakap Secondary School, Pdengshakap neibynta wow yoh u su tulop ya kiwa sikai wa ya iwa emkaam hi ka skur waroh kawi, da e khublei kyrpang u ya u Gillroy Tariang ya i booh Scheme yong oo ya ka skur neibynta ka yung skur wa thymme kamwa T. 10 Lak na ka MDC Scheme.
Hawa e yei klam, u kongsan u Gillroy da yaroh u ya ki dkhot ka Committee ka skur kiwa da yaleh chitom kammon wow thooh ya ki laad ki luti wow pynmih poisa yaka skur khang wow pynyoh yeiwa emkaam yong ka skur khang wow pynku yei nang i stad hapoh chnong wei khamtam ya kitu kiwa dooh wa duk kiwa ym yohlaad wow lai cha sor.
Heiyatoh waka Football Tournament da kyntu ya kiwa yalehke wow man ki kiwa ryntih, kiwa em ka mynsien wow maya uwi ya uwi, kiwa minot wow pynpliah khnang wow ye ki u ku na iwi i por cha iwi.
Haka yalehke nyngkong, da pynman hapyrdi ka Amlanai XI pyrchah ya ka Golden Lion FC (Rymbai) wei ha kani ka yalehke wa nyngkong, ka Amlanai XI da jop ko da 1-0 da ka kool u Lumlang Langshiang ha ka minit kawa 37.
Discussion about this post