Hadien 10 bnai i yakhun ya ka khlam COVID-19, i sdang wow pynkut ya ka khlam da sdang ha ka ri India waroh kawi ynne ka sngi, heiwa u Montri Rangbahdooh ka ri, u Narendra Modi da wai u ya i Inject dawai ha waroh kawi ka ri. I sdang wow e ya ki dawai wow yada na ka khlam toh deiwa e dawai chwa cha palat 3 klur ngut kiwa yakhun wa hakhmat dooh ki wakreh ha ka chnat i chait i khiah.
Ha ka jylla Meghalaya i e Inject dawai da sdang ha North Eastern Indira Gandhi Regional Institute of Health and Medical Sciences (NEIGRIHMS), kawa da sakhi da u Montri Rangbah, u Conrad K Sangma.
Hawa klam wa ki laad pathai khubor, u Montri Rangbah da kyntu u ya ki paidbah wa ym toh wow kheiñsting ya ka khlam Covid, toh u bood pynrkhiñ ya ki kyndon kamwa da phah da ka chnat i chait i khiah neibhah kamwa man kattæ ym pu ye wow e ya ini i dawai cha waroh kiwa chong chnong.
Da pyntip u wa ha Meghalaya, ynne ka sngi daw e dawai ya 832 ngut ki wakreh ha i chait i khiah, heiwa da sdang na ki 100 ngut na NEIGHRIMS, katwa ya kiwa sah u pyndep ha ki thaw wa da booh ha waroh ki District ka jylla.
Da pyntip u leh wa i e Inject u man ko neibynta 2 sien, wei iwa bood u man ko hadien 28 sngi. Da pyntip u leh wa i bynta wa nyngkong i e dawai u man ko neibynta ki wakreh hei chait i khiah, ha i bynta wa ar u man ko ya waroh kitu kiwa hakhmat wow yakhun ya ka khlam wei ha ka bynta kawa le daw e dawai cha waroh kiwa da palat 50 snem i rta wei ki bru kiwa da em chwa ya i chitom ha i doh i pran.
Ha iwi won i liang, u Conrad da ong u wa ynne toh ka sngi wow sñiawsarong wei ka wow sah kynmoo neibhah wa kani ka sngi da wanrah ko yei sñiawkmen wa i ngait ha ki paidbah wa ye wow yakhun ya kani ka khlam COVID-19.
