Ka e sikai chet baam dih cha kam ki Cake wa kiwi de ki mar baam wa ye u dai cha rood sarok namo ki Street Food kawa tip kam ka Street Food Vendor wa Craft Baker Course kawa dei mynkna da sdang ya ka ynnin ka sngi ha Jowai da ka Greta Solutions Training Academy kawa em ha Newhill Loomsooiung.
Kani ka e sikai toh kawa da yarap kyrchaan poisa lyngba ka Meghalaya State Skill Development Society hapoh ka Skills Meghalaya kam chibynta u wailaad wai luti yaki khon khynroo khyllood wa dooh khih dooh kreh yow ye ki wow yieñ hei kjat yong ki hi hadien wa pyndep ki yei sikai.
Ya kani ka e sikai da wan wai da u B.S. Sohliya, Deputy Commissioner ka West Jaiñtia Hills District hei emlang u F.G. Syngkon, Functional Manager ka chnat Industry, u Lambormi Suchen, Skill Development Officer West Jaiñtia Hills District wa kiwi.
Neiliang u Lambormi Suchen hawa klam da kyntu u wym toh u sarom u sdang yei kreh wa khian neibhah waroh kiwa mahajon leh sdang ki neiwa khian chwa.
Neitæ pyntip haroh u wa ka West Jaiñtia Hills lyngba ka District Skill Committee hapoh i yahkhmat u Deputy Commissioner da ye ko u e sikai 600 tam ki khynroo khyllood hadooh katni wei na kini 400 ngut da yoh kreh ki heiwa da em kiwa kreh wa kiwi wei em won kiwa sdang dei yong ki hi.
U F.G. Syngkon hawa klam da batai u yaki Scheme waphær waphær wa ye u yoh yarap poisa lyngba ka yung krehkaam yong oo neibynta u sdang seiñ khih wa kynthup leh ya kam kani ka khih chet Cake chet baam.
Neiliang u DC won da yooluti u wa kani ka thaw chah sikai u man ko kawa pynmyntoi bha wei kyntu u ya ki khynnah u minot ki u wan chah sikai yow yoh sikai hei rukom wa toh neibynta u lai chakhmat, wei hap ki leh wow kreh chitom yow ye u khih deiwa yieñ hei kjat yong ki neibynta u kyrchaan ya idæ waka yung ka sem.
Kyntu haroh u wow man kiwa chlur u kylli yei wym sñiawthooh neibynta i bha i pliah yong ki hi.
U DC chim haroh u ka laad wow pynkynmoo biang wa hapoh West Jaiñtia Hills ki laad e sikai hapoh ka Skill Meghalaya wa ye ki khynroo khyllood u yoh katkam i sap wa em ki wa kynthup yaka Electrician, Plumber, Auto Mechanic, Domestic Data Entry Operator, Street Food Cendors, Web Developer, Fashion Designing wa kiwi.
Ki khynnah ki wow chah sikai haka bhah namo ka Batch wa nyngkong em ki 90 ngut waroh wei ka Course wow pyndep ki toh 3 bnai. I por wow chah sikai toh nadooh 9:00 waje i step hadooh 1:00 waje i sngi kiwa em 60 ngut neitæ won 1:00 waje hadooh 5:00 waje i janmiet da em 30 ngut man-ka-sngi itæ Monday hadooh Friday.
Discussion about this post