Ynne ka sngi, ka yung krehkaam ka Chankylliang Development Society (CKDS) da pynman ko yaka Orientation Program kam chibynta wow wai ya ka sikai wa mynkna wa pynman da ka CKDS hi hapoh ka Training Center yong ka wa em hapoh ka chnong Khliehriat.
Kani toh neibynta ki khynnah ki wym em kaam em jaam, kamjooh leh ya kitu kiwa da ieh ya ka puræ puthi. Ya ka e sikai toh kammon wow chna Mobile Phone namo ka Mobile Repairing hapoh ka Meghalaya State Skill Development Society (MSSDS) lyngba ka Skills Meghalaya.
Haka yalang ynne ka sngi da wan leh da kiwa sikai chna Mobile heiwa da yoh yei pdiang burom na ka W. Lyngdoh kam ka chongknor kawa man leh kam ka Project Manager yong kani ka e sikai.
Da yoh leh yei klam na u Chanky Lyngdoh, uwa man kam u Managing Director yong ka CKDS, uwa da khana chaphang kani ka e sikai wei da kyntu u leh ya kiwa chah sikai yow chimkhia ki ya kani ka kabu ksiar kawa da yoh dei mynkna kamjooh leh ya kiwa sikai yow wan tista ki.
U Tiplem Pohthmi uwa man kam u Skill Development Officer yong ka East Jaiñtia Hills District da pynsñiawthooh chooh chooh u chaphang ka Meghalaya State Skill Development Society (MSSDS), ki laad ki luti kiwa da e ko khamtam ya ki khon khynroo khyllood ka chnong ka thaw hapoh ka jylla Meghalaya khnang yow yoh ki laad yoh kreh wei yow yoh u seiñ khih neibhah kam wada yoo wa dang duna ki khih ki kreh ha ka jylla wei dang boon bha ki khynnah khynroo kiwa chong khlem kaam khlem jaam.
U Taimingroy Lakhmie uwa man uwa e sikai hapoh kani ka Training Center da khana wei da batai u yei chem yong oo ha ka luti wada lai u hei puræ wei e sikai ha ini i chna Mobile. Da ong u leh wa ha kani ka pyrthai stat katni ym toh de iwa suk kam nachwa, kamtæ ka sorkar da pyrkhat ko yeini wei da e ko da kani ka e sikai wa mynkna hapoh ka Skills Meghalaya.
