Ki warep ka chnong Khliehtyrchi da yohlaad ki wow chimbynta ha ka e sikai wa 23 sngi kawa sdang nadooh ka 14 tarik uni u bnai kawa da wan wai paidbah da ka B. Blah kawa man ka BDO yong ka Thadlaskeñ Block kam ka kongsan deiwa ya emlang ka Mayfereen Ryntathiang kawa man ka President yong ka seiñ kreh mon sñiawbha wa tip kam ka Grassroot.
U Chenmiki Laloo uwa naka seiñ Grassroot da khana u wa daw e sikai wow ri ngap, thung syntu, i chet baam tynre, chet Cake, i pynkylla sboh yei jhep, i pynmih baam sñiang, i chna dawai khñiang ya ki jhoor, i chna umsoh, achaar, Wine, switmit, kammon wow seiñ khih yong idæ, u man kam kiwa yahkhmat wa i rukom klam paidbah.
Da khana u leh wa kani ka e sikai toh kawa da kyrchaan poisa da ka Quest Alliance na Bangalore, ka Grassroot da pynman ko ya ini deiwa ya krehlang waka Society for Urban and Rural Empowerment (SURE).
U Dr. H.H. Mohrmen uwa man kam u Secretary yong ka SURE da kyntu u ya ki warep kiwa wan chimbynta wow wan tista u pyndep yei chah sikai neibhah daw yoh myntoi ki chiboon kamjooh ki laad yohkaam wei yow suk ki leh wow jied ya iwa sñiawyatoh wa iwa sñiawsuk ki u leh.
