Ka Society for Urban and Rural Empowerment (SURE) kawa man kawi na ki seiñ wa e sikai wa da tipmit da ka sorkar hapoh ka Meghalaya State Skill Development Society (MSSDS), da sdang ko ya ka e sikai yow pynkhai im biang yei chna Khon Muke (Doll Making) kawa chi bnai kawa da pynman haka Training Centre ka SURE kawa em ha Thluwania, Ladthalaboh, Jowai.
U Dr. HH Mohrmen kam u khlieh kani ka seiñ da ong u wa ka SURE ym kwah ko wow e sikai da kiwa kiwi da jooh e kiwi tangwa kwah ko wow sdang da iwa thymme iwa ym pu jooh em wa leh, kiwa ye wow e kaam e jaam ya ki khynroo khyllood.
Ya ini i e sikai da wan wow leh da ka Ibaphimon Shylla kawa man kam ka Fashion Designer da ka thong wow pynim biang ya ini i kaam iwa ym jooh em de u yoo wa dai cha ki yaaw ki haat neibhah nachwa jooh dai ya kini ki jait tiar kyndeh ke.
Ha ini i e sikai da pynriam ya kini ki Khon Muke da ki riam tynre ka jaitbru kam ka Khyrwang, Thoh-Saru, Muka, Ryndia najrong wa pyndeiñ deilang wa ki paila, ki khadu, ki laket wa ki de kiwa man kiwa da jooh riam lang ki bru khamtam ki Pnar wa ki War.
Ya kini u chna leh hei rukom wow ye u pynriam hapoh ki kari kamjooh wow pyndait ha ki chabi wei ye u dai ki ha ki dukan yow thied kiwa wan uiñke suwari wei ye ki u man kam kam ki tiar wow e sñiawbha.
Kawi na kiwa wan chah hikai kawa tip kam ka Lina Timung kawa na ka chnong Barato da khana ko wa em i kyrmen wa kini ki Khon Muke u lai yaaw bha ki wei ka leh toh kawa em dukan soor that, kamtæ ye ko wow pynemkaam da ki that kiwa da tam na dukan yow ye u pynduna yei noh ya ki thaw ki wym ye de u pynemkaam.
Ka S. Suchiang kawa na ka chnong Jowai kawa da wan leh wow chimbynta, da sñiaw skem ko wa ini waroh daw yarap i wow seiñ khih.
Waroh da em 30 ngut kiwa da wan wow chimbynta ha kani ka e sikai.
Discussion about this post