Ka Additional Deputy Commissioner ka West Jaiñtia Hills, ka HML Kynta ynne da wai paidbah ko yei e tika neibynta ki khonboo wa ki khynnah kamjooh ya ki kynthai wa punkhon wa tip kam ka Intensified Mission Indradhanush (IMI) 5.0 ha ka yalang wa da pynman ha 100 Bedded MCH Hospital, Panaliar, Jowai.
Ka HML Kynta kawa man leh kam ka kongsan ha kani ka sngi hawa e yei klam da pynkynmoo ko wa kani ka e tika toh kawa da bhah ha ki 3 bynta kawa mar 6 sngi wei u pteiñ ko hadooh ka 14 tarik u Naichiphaw uni u snem.
Ini i e tika toh kawa daw pynman ha waroh ki thaw sumaar namo ki Health Centre wei man i dei mynkna, kamtæ da pynchlur ko ya ki manbei manpa wow chim kabu ya ini deiwa wan yah ya ki khon yow chim yei tika.
Neiliang u Dr. E. Suchiang, Paediatrician da ong u wa ini i tika toh wow yada ya ki khynnah na kiwa boon ki jait kjut wa ya poor, kamtæ da pynchlur u ya ki bei ki pa wow yada ya ki khon ki yow yoh ki yei chait i khiah.
Neiliang ka Dr. Helen Uriah, District MCH Officer, Jowai da ban joor ko yei emkaam ki Immunisation Card wei da kyntu ko ya ki bei ki pa wow rah lang ya kani ka Card yow suk u kynmoo wei wow tip hadooh katwon sien wa da dep wow e tika wei wow tip leh mynnu u hap ki wow wan chim tika biang.
Chooh chooh da pyntip ko wa ya kani ka IMI Campaign toh nadooh ka 7 tarik hadooh ka 12 tarik u Naisaphra, neitæ won 11 tarik u Naikhynde hadooh ka 16 tarik u Naikhynde wei neitæ won nadooh ka 9 tarik u Naichiphaw hadooh ka 14 tarik u Naichiphaw uni u snem, kamtæ da pynchlur ko ya waroh wow ya chimbynta ki.
Ya kani ka yalang da pynlai da ka Dr. (Mrs) M. Syngkon, District Surveillance Officer wei da yoh ya ki kyntien e khublei na u Dr. E. War, Medical Superintendent, 100 Bedded MCH Hospital, Panaliar, Jowai.
Discussion about this post