Ka FKJGP-Nartiang Area Unit ha ka 29 tarik uni u bnai da wai pyrda ko ya ka 1st U Mar Phalangki Open to All Football Tournament 2021 ha Madan Thad Nartiang heiwa u Thombor Shiwat, MDC ka thaaiñ uwa man leh u CEM yong ka JHADC da man u kam u kongsan wow wai pyrda ya kani ka lympung yaleh bol.
U symbood kongsan ha kani ka sngi toh u D.S. War, Chief Organising Secretary FKJGP-Jaiñtia Hills Zone uwa man leh u waheh chnong yong ka chnong Namdong-B.
Ha kani ka sngi da wan wow pynphooh pynphieñ wei sakhi lang da ki waheh ka cnong Nartiang wa kynthup ya u waheh chnong u Mum Phalangki, u Acting Dolloi u Kloi Pale, u Don Dhar u Pator Nongpyrda wa kiwi kiwi de deilang wa ki bru paidbah.
Ya kani ka lympung da e naam hei pyrtuid u Mar Phalangki uwa man u bru wa khlan bor bha uwa da em ha ki parom warim wa jah uwa na ka chnong Nartiang hi.
Ha kani ka lympung da wan chimbynta da 34 tylli ki Team heiwa kiwa yoh yei jop Final daw rah ya ka song poisa wa T. 2 lak wei kiwa yoh wa ar daw yoh ki ya ka song poisa wa T. 1 lak.
Heipor miet ka KJGP Nartiang Area Unit da pynman ko leh ya ka yakob chaad ha Community Hall ka Nartiang wa da wan chim bynta da ki 20 ngut ki khon khynroo khyllood ka thaaiñ Nartiang.
Ha kani ka yakob da jop u Deimon Niang uwa da yoh leh ya ka song poisa wa T. 4000, wa ar ka Syndong Sumer kawa da yoh ya ka poisa T. 3000 wa le ka Deiwahun Samating waka song poisa T. 2000 wei 5 ngut da yoh ki ya ka Consolation Prize kawa mar T. 200 samen.
