Ka Kyrmen Foundation chirup i yakrehlang waka Rangdajied United Football Club ynne ka sngi da sdang ko yaka chlem e sikai kawa dei mynkna neibynta ki khynnah ka East Jaiñtia Hills District kiwa em sap yalehbol kiwa em hapoh 10 snem wa hapoh 12 snem chynrang wa kynthai.
Ya kani ka chlem e sikai da tip kam ka Kynsai Football Coaching Program ka wow neh chisnem lynter neibynta 200 ngut ki khynnah, wei ki khynnah kiwa chah hikai toh kiwa dadep jied kynsai lyngba ka Trail wa da pynman haki bnai wa dep.
Yaka e sikai næ Coaching Program da pynman ha madan yalehke ka Deiñshynrum, East Jaiñtia Hills District, wei da e sikai da ki Coach waki bru ka Rangdajied United Football Club.
Ka thong hi yong ka Kyrmen Foundation lyngba kani ka Free Coaching toh yow pynpliah chooh chooh yei sap yalehbol ki khynnah khnang yow yoh u sai biang ya kiwa yalehke wa kynsai napoh ka thaaiñ East Jaiñtia ki wow mihkhmat yaka jylla waka ri kam haki por nachwa.
Ha kani ka sngi chwa wow sdang Coaching da em ka yalang tbian neibynta u pyn-eh-daw pyn-eh-nasib yaki khynnah kynthai wa chynrang, hei emlang u Kyrmen Shylla, Montri sorkar uwa man leh uwa pynlut pynsep ya kani ka Free Coaching neitæ u Eugeneson Lyngdoh, President ka Rangdajied United Football Club, ki MDC ka JHADC wa kynthup ya u Lasky Rymbai Dy. CEM, u Finelyness Bareh MDC ka thaaiñ, u MLA warim ka Khliehriat Constituency, u Justine Dkhar, kiwa chah khut sñiawbha, ki bei ki pa yong ki khynnah wa kiwi kiwi.
Neiliang u Kyrmen Shylla hawa klam kam u kongsan kyntu u yaki khynnah wow chimkhia ki ya kani ka kabu ksiar neibhah wa ka Sports hi ha kini ki sngi da man ko leh ka laad kamai ja-kpoh.
Wei heijooh i por pynbna u wa kat dang man MLA u daw pteiñ chooh chooh u ya kani ka Coaching wei daw thooh chooh chooh u ki laad ki luti neibynta u kyntu ya kiwi tawon ki jait sap yong ki khynnah.
Kiwa de wa e yei klam ha kani ka sngi toh u Eugeneson Lyngdoh, u Lasky Rymbai, u Finelyness Bareh wei da yoh leh yei klam neibynta ki bei, ki pa yong ki khynnah wa kiwi de.
Discussion about this post