Ki dkhot ka JSU ynne ka sngi da mih sarok ki wow kdoh lama yong ya ki kari wa lai ha sarok kam ka dak wow pyrchah ya i ku dor ware i phñiang kari.
Ya ini i kdoh lama da leh ha Jowai ha laad Kiang Nangbah Government College wow pynyoo ya i dak yakrehlang wa ka Meghalaya Joint Action Committe of Commercial Vehicle hajrong i yakhih sangeh kamai.
U President ka seiñ, u Jersom Shylla ryngkat wa ki dkhot da mih ki ha sarok wow kdoh lama yong deiwa kyntu ya waroh kiwa yah kari wa ki paidbah ka jylla yow mih ryngkat wow pyrhchah ya i leh embor ka jylla wow pynku dor ya i phñiang na ka T. 72 cha ka T. 91 iwa mut wa i dor i phñiang da ku syndet i da T. 18.
Ka seiñ da dawa ko na ka sorkar wow pynhiar i dor i phñiang kari neibhah wa ya ka dan ye u chim ym du na i phñiang tangwa dang em kiwi ki mar ye u chim dan neibhah i phñiang ktah i ya ki paidbah liang wanang.
