Ka seiñ Kiang Nangbah Iasiat Khnam Memorial Society (KNIKMS), Jowai da sdang ko ynne yaka leh warom yei dap 160 snem ka sngi yap u Kiang Nangbah deiwa pynman chwa yaka yakob leh droma ha Yungwalieh Panaliar, Jowai heiwa ka Group HBJ da man ko kawa jop na waroh deiwa pynyoo ya ka parom tbian ka Phan Nonglait.
Ha chwa wow sdang ya ka yakob de em ka yalang tbian wa pynlai da u President ka seiñ, u Pearlet Toi heiwa u A. Andrew Shullai, MDC Jowai Central Constituency daman u kam u kongsan. Dayoh leh yei klam na u dkhot ka seiñ, u Riquoma Rq. Laloo uwa da ong wa i yooluti yong oo ha kani ka yakob toh u yoh u yoo ya ki droma yong boon ngut kiwa yaleh laitlooid ka ri, heiwa kiwa ya chimbynta u pynyoo ki jar jiar ki sap ki yong ki. Da kyntu u ya kiwa ya chimbynta kamjooh ka seiñ hi-ai leh wow kyntu ya ka sap ka phong ki khon ka ri ha ki liang boonjait, neibhah kani man ko kawi ka luti wow pynneh pynsah ya ka dustur riti wa sikai ki waheh.
U kongsan hei klam yong oo da ong u ini toh i sdang wa khroo yong ka Society wa kammon u thoohlaad u pynneh pynsah yaka yalehke droma. E yaroh u leh ya ka seiñ, neibhah boonsien jooh ya ong charood chakiar wa ka seiñ Kiang Nangbah tip ko du ya ka 30 tarik donhi u Kmaichonglad kawa man ka sngi yap u Kiang Nangbah. Heini won dayoo wa lou sdang ka seiñ u leh pynem warom ha kiwa boon ki rukom. Da kyntu joor u wa ymtoh u pynneh pynsah du kat ya kini donhi kiwa sikai u warim; emkaam haroh u pynneh pynsah wei wow pynim yei hok yong i dahi, iwa ka jaitbru yong i toh u ksoh u kune ko ha kiwa boon ki liang wa ka jaitbru yong i katni awdooh hi-eh ko yei hok yong ka. To u tip i yeini neini chakhmat, da ong u Andrew.
Da saam ya ki e sñiawbha cha kiwa bichaar da uwi na kiwa seiñ ya ka seiñ wa dangkhlan wow wan cha ki kaam yong ka, u Wonder Shilla.
U President ka seiñ da khana u, wa daw pynman ya ka Drawing Competition ha Loompyrdi Iongpiah ha ka 24-12-2022 heipor 10:00 waje i step, ka Yasiat Khnam Pyllah ha madan Madiah Kmaiblai ha ka 27-12-2022 heipor 10:00 waje i step katwa ka Traditional Song Singing Competition won ha ka 30-12-2022 ha madan Madiah Kmaiblai hi nadooh i por 10:00 waje i step.
Kamtæ da khut u ya waroh ki lok najan najŋai wow ya sakhilang ha ka 30-12-2022 heipor 1:00 waje i sngi kamwa jooh man khlieh snem.
Da yoh ya ki kyntien e khublei na u Secretary ka Arts & Culture Committee, u Barlee Moore Shilla.
