Ka KSU da pynman ko ya ka Maitshaphrang Khasi League T20 Cricket Tournament 2021-2022 kawa da sdang ynnin ka 2 tarik ha Polo Cricket Ground, Shillong kawa da wan wow chimbynta da 32 tylli ki liang kiwa da yabhah ha ki 8 tylli ki dhab (Group).
Na kini ki 32 tylli, 21 tylli toh kiwa na East Khasi Hills, 6 tylli na West Jaiñtia Hills, 1 na Ri-Bhoi, 1 na West Khasi Hills, 1 na Eastern West Khasi Hills, 1 na South West Khasi Hills wa 1 na East Jaiñtia Hills.
Ha ka yalehke wa nyngkong, ka Ummulong SC da yachem ko waka The Occult heiwa ka Occult da jop ko ya ka kylla khlem wei da jied ko wow Bat nyngkong.
Ka Occult da ye ko wow kamai 148/8 na ki 20 Over deiwa kamai boon dooh u Damanbha Roni 42 Run na 35 bol wa u Eddyson Sohklet uwa yoh 25 Run na ki 35 bol. Kiwa yoh Wicket ya ka Ummulong toh u Pynskemlang Phawa uwa yoh 3/21 na ki 4 Over wa u Ricky Nongbet 3/18 na ki 4 Over.
Hawa jubab, ka Ummulong da yoh ko 60/10 na ki 13.5 Over deiwa kamai boon dooh u J. Langmi Bamon uwa yoh 16 Run na ki 24 bol. Kiwa kawang bol ka Occult kiwa da leh bha toh u Aldric Nongkynrih uwa da yoh 2/6 na ki 2 Over wa u Bradley Mawthoh uwa da yoh 2/9 na ki 2 Over.
Kamtæ ka The Occult da jop ko da 88 Run.
Yei naam Man of the Match da yoh u Damanbha Roini ka The Occult uwa da yoh 42 Run na 35 bol.
