Ka Deputy Commissioner, East Khasi Hills District, ka I. Laloo ynne da wai ko ya ka lehkmen 68th All India Cooperative Week ha ka yalang wa pynman ha ka yung krehkaam ka Meghalaya Cooperative Apex Bank Ltd, Shillong.
Ya kani ka yalang da pynman da ka yung krehkaam u Assistant Registrar of Cooperative Societies, East Khasi Hills District, Shillong chirup wa ka Meghalaya Cooperative Apex Bank Ltd., Shillong hajrong ka phang “Prosperity Through Cooperation” katwa ka phang pyrdi kani ka sngi toh “The Role of Co-operatives in Tackling Covid Pandemic and Strengthening Health Cooperatives”.
Hawa e yei klam ha kani ka sngi ka I. Laloo da kubur ko ya i chakri wa da e da ki Health Cooperatives ha ka ri heiyatoh wow yakhun pyrchah ya ka khlam COVID-19 deiwa ban joor yei emkaam wow pyrkhat bha wei i kreh chirup hawa sdang ha ki chnong ki thaw chwa wow pynyaar ya i rukom kreh deiwa pynksan yei emkaam i krehlang yong kiwa embynta ha ki kreh neibynta i bha i miat yong i yaleh hapoh ka jylla.
Da yaroh ko leh ya i kreh ki Cooperative Society ha ki snem wa dadep deiwa ong wa kam kini ki Society emkaam wow e ya ki ya ka rynsaan wow chakri rap janai wei wow pynchlur leh ya kiwi. Da ong ko leh wa em chiboon ki kaam wa ye ki u leh lyngba ki Cooperative Society wow pynduna ya i duna ha i yoh i laa ha ka imlang sahlang.
Chooh chooh da kdaw ko ya ki kreh ki sahep ka chnat Cooperative Department wow wanrah ya i sñiawthooh heiyatoh wa ki Scheme sorkar kam ka Piggery Mission, Milk Mission, ka Integrated Village Cooperative Societies wa kiwi kiwi. Da ong ko leh wa ka thong yong ka Cooperative Movement ha ka jylla toh wow pynkupbor ya ki Cooperative Society khnang wow ye ki u pyrkhat neibynta i rukom kreh wa thymme.
Kani ka tayaw lehwarom hajrong ka thong wow elaad ya ki Cooperative toh wow khana ya ki parom, ki kreh wei wow pyrkhat ki ya ka luti krehkaam neini chaphrang khnang wow pynkhlan ya i kreh ha ki por wow wan wei daw pynman leh ya ki yalang kam ki Workshop, Seminar, ki yakob wa kiwi kiwi hadooh ka 21 tarik uni u bnai.
