Jowai: Ka Christian Upper Primary School, Lumshnong kawa da seiñ da ka District Narpuh Presbyterian Church ha u snem 1968 da yoh ko wow wai pyrda yei dap 50 snem yong ka lai luti yong ka ha kani ka 17 tarik uni u bnai da ka lehkmen wa pynman ha pchem ka skur.
Ha kani ka sngi da em u Vincent H. Pala, MP uwa man kam u kongsan katwa u Rev. M. Shylla (Senior Executive Secretary Narpuh Border Presbytery) da man u kam u symbud kongsan hei emlang u Grimlang Dkhar, Secretary Golden Jubilee.
U kongsan hawa e ya i klam yong oo, da yaroh u ya kiwa yahkhmat ka niam kiwa chynna jngai heiwa ki da seiñ ki ya kani ka skur kawa da man i kyrkhu ya ki paidbah. Da e u leh ya ka yaroh ya ka Balang Presbyterian Lumshnong kawa da chimkti wow pait wow pynlai ya kani ka skur hadooh wa da ye ko u poi chadooh ka kyrdan Secondary wei da yaroh u leh ya ka skur wa da ye ko u yoh ya ka result kawa bha ha ka Exam SSLC heiwa waroh ki khynnah da lait lut ki ha kini ki ar le snem wa da dep.
U kongsan da pynsñiaw u leh wa smat u wow yarap ya kani ka skur ya i emkaam yong ka ya kiwa da pynsñiaw ha khmat yong oo lyngba ka dorkhat wa da e da ka School Managing Committee.
Hawa pynkut, da pyn-eh bok eh nasib u ya ka skur wow nang ku ko cha khmat neibynta wow e chakri kawa bha kawa yatoh katkam ka juk wa katni wei da ong u leh wa e wa kani ka lehkmen dap 50 snem namo ka Golden Jubilee u man ko kawa jop hadooh ka sngi wow pynkut ya ka.
Ya kani ka yalang leh kmen Jubilee da pynlai da u Rev. E.K. Mujat, Chairman Golden Jubilee Committee Christian Upper Primary School Lumshnong, EJH.
Ha kani ka yalang da em leh ki bru wa pawkhmat yong ka District wa Presbytery Narpuh, ki bei ki pa yong ki khynnah skur deilang wa ki Paidbah yong ka chnong Lumshnong hi waroh kawi.
Discussion about this post