Ka Dorbar Chnong Khimusniang, Jowai ynne ka sngi da sdang ko yei lehkmen yei dap 75 snem i lai luti ka chnong kawa tip leh kam ka Platinum Jubilee deiwa pynman yei yachem lang ha pchem ka Indoor Sports Hall ka chnong heiwa da wan wow sakhilang leh da kiwa chah khut sñiawbha kamjooh ki waheh chnong na ki dorbar chnong waphær waphær ka chnong Jowai.
Ha kani ka lehkmen u F.W. Blah, CFO JHADC uwa jooh man leh kam u waheh chnong warim ka Khimusniang da man u kam u kongsan, u J.K. Rymbai, President ka Synjuk Waheh Chnong Jowai da man u kam u symbood kongsan.
Chwa wow sdang i lehkmen haka yalang wa pynlai da u L. Lyngdoh waka R. Patlong, da yoh i puræ naka ktien u Blai kamjooh i duwai na u Rev. E. Nongpluh, da yoh i klam pdiang na u J.M. Pohsngap, Chairman Platinum Jubilee cum Organising Committee, uwa da kdaar leh hajrong i emkaam u man ki bru wa ya maap kylliang yei tam i duna neibhah wym em wa biang lut waroh.
Heiyatoh waka parom tbian i lai luti wa 75 snem ka chnong Khimusniang, da pynsñiaw da u N.K. Lamare, Chairman ka Souvenir Committee uwa da khana yei eh i khoo wa boon jait wa maad ka chnong heipor nachwa kamjooh leh i ye won ka chnong u ku u roi kat nang lai ki por.
U J.K. Rymbai hawa klam da yaroh u yei lai luti kani ka dorbar chnong kamjooh leh pynchlur u yaki khon ka chnong wow nang pteiñ chooh chooh ki yei yatylli ha kiwon kiwon ki kaam chnong khamtam neibynta kani ka lehkmen kawa daw pteiñ chi snem lynter.
Neiliang u kongsan won da kyntu u ya ki khon ka chnong wa hawa chaniah yaki u ksoh ki ya iwon iwon i kaam neibynta ka chnong ka thaw kamjooh ka imlang sahlang toh u chimkhia ki u wan chakhmat wym toh u yang dei pynbor bait, katwa ki pli ki kattu katni ki waheh won da yoo wyrai wa dohyap ki u toor hadooh wym tip de ki tang yei chait i khiah yong idæ.
Tæ kamwa dap 75 snem ka chnong booh u i kyntu yaki khon ka chnong khamtam ki khynroo khyllood wow kylla noh i thij i pyrkhat dei wow chimkhia hei kaam yonglang la hei kmen sñiawbha næ i eh i khoo ka chnong.
Ha kani ka sngi da wai leh ya u moo sahnaam yong ka Platinum Jubilee kamjooh u Mascot, wei da e Award leh yaka Wansaka Eugenia Hinge kawa da jop haka yakob chna ya u Platinum Jubilee Mascot Competition.
Neitæ da yoh i rwai pdiang na u Eladmitre Dkhar, i rwai yei sur Platinum Jubilee kamjooh i chaad na ki kynroo kyllood ka Dorbar Chnong Khimusniang. Da yoh leh i klam na u Waheh Chnong ka Khimusniang, u A. Lamare, katwa u E. Suting, Secretary Platinum Jubilee cum Organising Committee da e u ya ki kyntien khublei.
Ha kani ka sngi da ah leh ya u Cake Platinum Jubilee da u Rev. K. Syiemlieh.
Discussion about this post