Sdang ka lehkmen lyngkhooh snem wa 75 ka Government Boys Higher Secondary School

Jowai : Ka lehkmen lyngkhooh snem wa 75 næ ka Platinum Jubilee ka Government Boys Higher Secondary School, Jowai da sdang ynnin ha madan Jrisalein, Jowai heiwa u Deputy Chief Minster, Prof. R.C Laloo da man u kam u kongsan.

U Dr. R.C Laloo heiklam u da engooh u yow Blai wada elad ya oo wow embynta u heiwow sdang yaka lehkmen lyngkhooh snem wa 75 yong ka skur kawa jooh man u kam u khynnah skur yong ka weida jooh man u leh kam uwa sikai ha kani ka skur.

U Parliamentary Secretary ka tnat Education, u W.D Sangma, kam u symbood kongsan da yaroh u ya ka skur kawa da ye u pynmih yaki bru kiwa stat kiwa chemphang.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Hachwa u sdang ka yalang, ka Principal ka Government Boys Higher Secondary School, ka kong M. Pde da pdiang burom ko ya waroh cha kani ka lehkmen katwa u Secretary ka Committee u ma R. Dhar, da khana u yaka parum ka skur kawa da sdang nadooh u snem 1941. Heipor wa sdang kani ka skur da tip ya ka kam ka Welsh Mission M.E School wei hadien da chna ka sorkar da i yung trep wei da chim wai ko ar tylli ki yung samen heiwa da pynman skur heini i thaw hadooh 13 snem.

Ha u snem 1952 da chna ya ka yung skur ha u loom Magazine wei ha u snem 1955 ka kyrriah ya ka skur cha ka thaw wa em ko katni. Ka skur da pynkhreh ko ya ka exam HSSLC wa nyngkong yong ka ha u snem 1962.

Ya ka lehkmen da sakhi deiwa ah u Deputy Chief Minster, Prof. R.C Laloo ya u cake, da em leh ka March Pass, Mass Drill waki Cultural Programme da ki khynnah ka skur.

Ha kani ka sngi da em leh kiwa kreh warim ka skur wa kiwi kiwi.

Ka skur da pynmih ko chiboon ki bru kiwa da ksoh ya ki kyrdan waheh ha ki District, ka jylla, wa ka ri, kam u Tynde u Dr. Erasmus Lyngdoh uwa jooh man kam u Personal Physician u President warim ka ri India u Fakuruddin Ali Ahmed u Spharbha Lyngdoh, u Turnel Challam, u Riangmon Passah u Herbert Suchiang, u Dr. B. Pakem uwa jooh man kam u Vice-Chancellor ka NEHU, u ma Barryl Lamare, u ma Mihsalan Suchaing, u ma Chesterfield Davies Kynjing, u ma Vincent Pala u ma R.C Laloo, u ma Stephenson Mukhim, wa kiwi kiwi.