Ynne ka sngi Pynsiñ ka 6 tarik, ki khon ka Raij Jowai da sdang ki ya ka lehniam Behdieñkhlam kawa tip leh kam ka lehniam Soo Sngi Le Yaaw.
Ki khon ka Raij heipor chiteiñ sngi da sdang ki da ka Siang ka Pha iwa mut wa da e baam e dih ya ki Sangia Saret ki yong ki ha jar jiar ki Kmaiyung wa ki Yungblai wa em hapoh ka Raij Jowai.
Hadien wa dep ka Siang ka Pha, ki khon Raij da pynlang paaid ki ha Khliehchnong yow pynkhreh wow lai booh ya ka Symbood Khnong cha Loom Sooiung na Khloo Langdoh.
Chirup wa i ood ka bom, ka bhuri, ka bikur wa ki chæng-chæng ki paidbah kiwa kynthup khynnah wa waheh da kyriaw da chaad ki ha tymbud u sarok katwa kiwi won da kit da bah ki ya ka Symbood Khnong hadooh wa poi ha Loom Sooiung (Jowai-Shillong Indica Stand).
