Ka Elaka Lakadong Sports Association (ELSA), East Jaiñtia Hills District da yoh biang ko u sdang ya ka lympung yalehbol kawa tip kam ka “2nd Elaka Lakadong Knockout Football Tournament 2023” ya kawa da pynman ha chnong Borghat ha ka 16 tarik uni u bnai.
Ya kani ka lympung yalehke da wan wai ya ka da u M. Khonglah kam u kongsan hei emlang u K. Swer, Waheh Chnong Borghat wa kiwa kitkaam Sports kamjooh wa kiwa kitkaam ka Elaka nadooh ki Waheh Chnong, Secretary wa em hapoh ka Elaka Lakadong.
Da pynlai ya ka yalang ha kani ka sngi da u E. Mynthlu, Secretary Elaka Elakadong, uwa pynkut leh ya ka yalang deiwa e khublei ya waroh kiwa emlang.
U kongsan hawa e yei klam da pynsñiaw u wa toh ka kaam Sports katni ym em de man ko kam ki por warim neibhah katni toh kawi ka laad kamai im ja-kpoh lada em sap heiliang ka yalehke khamtam ki bru cha thaaiñ khappood toh kiwa pnah bha heiliang ka yalehbol. Da ong u leh ka yalehke toh kawi ka jait pynjra doh khnang wow yoh yei chait i tram. Chooh chooh da ong u leh kam kiwa yalehke toh u man kiwa kiar na i dih pynmuaid wa sih.
U Namphrangmi Talang, uwa man u General Secretary ka ELSA da khana kani toh kawa ar wa da pynman ya kani ka lympung yalehke tang sñiawkmen u wow khana watoh kam kiwa yahkhmat da yoh mynsien biang u pynman hadien kawa sien nyngkong wa pynman toh kawa jop. Da ong u leh deiwa pynman ya kani ka lympung hapoh chnong daw wanrah ko yei maya para khon ka Elaka, u ya tipmit iwi yeiwi khamtam u pynchlur ya ki khon yong ka Elaka. Neitæ da khana u leh wa toh ka Association em ko ka thong wow thooh ya ki khynnah wa em sap hei liang ka yalehbol khnang wow yoh u e yei sikai deiwa phah cha ki thaw wa e sikai pynpliah.
U Kyrmen Swer da pynsñiaw u yei sñiawkmen wa ka seiñ da ye ko u pynlai bait ya kani ka lympung khamtam u kyntu ya ka sap ki khynroo yalehke Sports hapoh Elaka. Da khana u leh wa ka chnong da pdiang ko dei sñiawbha ya ka ELSA wow pynman ya kani ka lympung heiwa da kitbok u wow nang ku chaphrang hei lai luti yong ka.
Ha kani ka sngi sdang da pynman leh ya ka yalehke hapyrdi ka Chnong Pdeiñwahkhynriam FT pyrchah ya ka Chnong Borghat FT heiwa ka yalehke da man ko kawa yoosuk bha khamtam ka Borghat FT da yalehke bha ko heiwa da pyrchang ko u pynkhih ya ka jaar yong ka Pdeiñwahkhynriam tangwa da lait bait ka bol wei da man kiwa sepai kamtæ ka kylla step da man ko kawa kut mar 0-0.
Hawa pteiñ ya ka kylla miet ka yalehke da man ko kawa yathaiñ bha heiwa waroh ar liang da pyrchang ki u thooh laad wow pynkhih jaar heiwa ka Pdeiñwahkhynriam ha ka minit kawa 50 da yoh ko u thap ya ka kool lyngba u Aiban Shadap kawa dang pynchongchit chooh chooh ya ka yalehke heiwa ka Borghat FT da thooh laad ko wow yoh u pynuiñ ya ka katai ka kool wa chah thap. Neitæ katwa ka yalehke dang man ko ka lai chakhmat, syndet syndet ka Borghat da yoh ko ya ka Penalty ha chwa u kut i por yalehke ha ka minit kawa 70+1 kawa da chut da u John Amkhloo kawa da pynyaryngkat mar chi kool.
Kamtæ da rah noh ya kani ka yalehke cha ka Penlaty Shoot Out heiwa ka Pdeiñwahkhynriam FT da jop ko da 3-2 ya ka Borghat FT.
