Jowai: Ka yalehke Chess wa pynlai daka Jaiñtia Hills District Chess Association da sdang ko hei janmiet yong kani ka 24 tarik ha Thomas Jones Synod College Jowai, wei da wan chimbynta kamwa 30 ngut wa kynthup ya 12 ngut ki khynnah skur wei 18 ngut haka kyrdan Open to All.
Haka yalang wai ya kani ka yalehke u Biju Singh, Secretary Meghalaya Chess Association khana u waka yalehke Chess toh kawa emkaam ya ka “Discipline”, e ko i sikai ha liang wanang yong i neibhah chwa wow lai chakhmat yaka yalehke hap wow pait wow pyrkhat bha, kamjooh heiwa im lada lai kulmar hi eh Iikhlem em ka thong ympoi cheiwon cheiwon leh.
Sa iwi won leh ong u, kani ka yalehke phær ko na kiwi tawon ki jait yalehke neibhah ym emkam u khuslai ya ka madan yalehke, ka suiñbneiñ neibhah du hei thaw wa khian donhi leh dahoi u pynman.
Neiliang u President ka Meghalaya Chess Association u B. Kharbani ong u, yow ku hei yalehke Chess emkam u chimkhia wei pynlai yumut.
Kamtæ kyntu u ya ki manbei manpa wow e laad ya ki khon wa em sap wei da khana haroh u wa hapoh ka jylla da sdang wow pynkhlan ya kani ka yalehke deiwa booh ki Association haki district waphær waphær khnang yow pynku khamtam yaki khynnah skur neibhah ha India ka sorkar leh da booh ko yaka Chess kam kawi naka jait ialehke wa emkam bha, wei da boon kiwa yalehke wa wanrah takma ksiar takma rupa hapoh ka ri wei kamjooh leh ha kiwi ki ri.
Yaka yalang ha kani ka sngi da pynlai da u President Jaiñtia Hills District Chess Association u Philemon Lyngdoh chirup i emlang u Principal ka Thomas Jone College Dr. R.R. Kharkongor wa kiwi.
Discussion about this post