Ki bor pait bor pynlai ka Meghalaya Bharat Scouts & Guides West Jaiñtia Hills District kam chibynta i leh burom ya ka sngi wa khroo wa kyrpang yong ka rymaw næ ka World Environment Day, ynne ka 4 tarik da sdang ki u pynman ya ka yalang kyrpang kawa da pynman chitayaw lynter kawa tip kam ka World Environment Week wei ka wow kut ha sngi Pyngkat 10 tarik yong uni hi u bnai.
Ha kani ka sngi kam i sdang yong kani ka leh burom, da em ka yalang yahkhmat wa tbian hei emlang ki dkhot ka Meghalaya Bharat Scouts & Guides, West Jaiñtia Hills wa kynthup ya u District Secretary u Ohiwot Laloo, Jt. District Secretary u Adiam Bthuh, District Organiser Scouts u Elvis Dkhar wa ka District Organiser Guides ka S. Shylla.
U Ohiwot Laloo, District Secretary MBS&G, West Jaiñtia Hills hawa klam, da ong u wa i pynman ya kani ka leh burom ha uni u snem man i iwa rap phær hawa nujor ha ki snem wa da lai neidaw wym yoh laad de u yamih yalai kamwa jooh, han la kattæ leh yooluti u wa i chim yong ki wow leh yeini u man ko ka nongmuna ya kiwi ki bru wa chong chnong wow ya chimbyntalang ha kani ka World Environment Day deiwa leh iyi iyi ha man ki yung ki sem neibynta wow yoh ya ka la-ær kawa khooid u riñ u pynhiar mynsien kamjooh chibynta wow pynman ya ki soodong sookun ka mariang kiwa dap wa chlai da ki dieñ ki khloo wa yirngam.
