Ka North Eastern Adventist University (NEAU) deiwa ya krehlang waka Society of Urban and Rural Empowerment (SURE) deiwa kyrchaan ka Swachh Bharat Mission Urban, Shillong da pynman ki yei sikai kammon wow yabhah wei wow tip kiyi de ki jait jhep wa mih napoh kani ka skurbah wa em ha Khliehtyrchi.
Ya kani ka e sikai da wan wow chimbynta da kiwa lai puræ ka NEAU hapoh i pait u Wompher Shadap, Subject Capacity Building Specialist, SBM Urban PMU, Urban Affairs Department, Shillong, ka Sharon Syiem, MBA Waste Management wa u Shantilang Diengdoh, Infinity Solution, ka Niwanka Shylla, ka Banisha Lamar, u Marleki Dhar waka Isakani Susngi naka SURE.
U Wompher Shadap hawa e yei klam da ong u wa ya kani da pynman yow sñiawthooh ki jait jhep wa mih napoh kani ka skurbah wei yow tip leh kammon u leh yei jhep wa mih.
U Job Kawlni uwa man kam u Professor kani ka University da pyntip u wa ini i jhep wa da pynlang toh kiwa mih na kiwa boon ki thaw sah nadooh ki Hostel, ki thaw chet wa ki thaw baam wei ki jhep wa da sai toh kiwa da pynlang ha ki ar sngi donhi wei wow tip leh kammon wow yabhah wei kamoon wow leh ya ini i jhep deiwa ya krehlang waka Jowai Municipal Board.
Ya ini da leh hadien wa ha u Naisan da wan u Wompher Shadap wa u Dr. H.H. Mohrmen, Secretary ka SURE cha kani ka University yow yaklam chaphang ini i jooh i kaam heiwa hadien ini, u Vice-Chancellor, u Dr. Paul Bhaggyien deiwa kyrchaan ka Dr. Jemima M. Marak da chim ki yaka rai wow sdang noh wow leh dei kaam, kamtæ haka 17 tarik uni u bnai da sdang wow pynman ya ka sikai ya ki Volunteer ka NEAU da u Wompher lyngba ka Video Conferencing.
U Dr. H.H. Mohrmen da ong u wa kattu ka thong toh yow paan yow booh ya ka Waste Recovery Centre (WRC) kawa khian hapoh kani ka University heiwa kiwa pynlai ya kani ka skurbah da bait ki wow e yei thaw yow booh ya kani. Da ong u leh wa ka SURE kmen ko wow ya krehlang kam chibynta wow pyrchang nyngkong hapoh ka thaw kawa da kær kut wa em kiwa imlang wa sahlang.
Discussion about this post