Ka Vertical Transportation namo ka Ropeway wow kit tiar wa da chna da ka NESFAS da wan wai ya ka haka 22 tarik uni u bnai ha chnong Dewlieh, East Khasi Hills wei kani man ko kawa ar wa da chna Ropeway ka NESFAS hadien ka chnong Nongtraw ha u Khonchonglad (Nov) 2021.
Ka Dewlieh, Nongtraw wa kiwi ki chnong haap ki hapoh ka thaaiñ Khadar Shnong wei ki thaw wa man chariñ ki loom heiwa ki warep chem chitom bha ki wow kit ya ki mar yong ki cha ki yaaw ki haat tangwa deiwa em kani ka Ropeway daw pynsuk bha ko ya ki paidbah.
Ya kani ka Ropeway ha Dewlieh toh wa da chna da ka NESFAS wa u Titosstarwell Chyne uwa man leh kam u Chief Executive Member ka KHADC lyngba ka 15th Finance Commission wow kyrchaan ya kiwa rep na chnong Dewlieh. U CEM da man u kam u kongsan hawa wai ya kani ka Ropeway hei emlang kiwa kreh ka NESFAS, ki waheh chnong wa kiwi kiwi.
U Titos hawa e yi klam da sñiawkmen u wa da wai ya kani ka Ropeway deiwa ong wa kani ha Dewlieh toh neiwa yoo u yei myntoi wa yoh ha Nongtraw.
Da e khublei u leh ya ka NESFAS wa da kreh ki yeini i kaam ha Nongtraw wa ha Dewlieh wei da kyntu u ya ki paidbah wow pynemkaam hok wei wow sumaar bha ya ki.
U Pius Ranee, Executive Director ka NESFAS da ong u wa daw pyrchang wow booh kam kani ka Ropeway ha kiwi tawon ki chnong neibhah wa man iwa toh dor wei myntoi bha ki warep.
U Nestar Kharmawphlang, Chairperson ka NESFAS, da ong u wa ini i kreh ka seiñ toh wow pynim yei rukom rep ki bru wei da kyntu u ya ka District Council wow kyrchaan bait ya ka NESFAS.
U Shemborlang Diengdoh uwa man u waheh chnong ka Dewlieh da sñiawkmen u wow yoo ya ini i kreh ka NESFAS deiwa e khublei leh ya ka kamjooh.
U Shaiphar Dohling, u Community Consultant ka NESFAS da ong u wa ka NESFAS daw pteiñ ko ya ki kaam wa bha yong ka ha ki snem wa daw wan dei kyrmen skem wa ka sorkar leh daw kyrchaan ko ya ki.
