Sdang ka NPP daka Social Media Campaign wow pynsñiawthooh ya kiwa thap Vote ya ki thong ka Party

Jowai: Ka National People’s Party (NPP) ynne ka sngi da sdang ko da ka Social Media Campaign yow pynsñiawthooh ya kiwa thap Vote ha waroh kawi ka thaaiñ mihsngi ya ki thong namo ka Agenda hajrong ka phang “One Voice, One Northeast”. Ka Party da booh ko hakhmat wow pynyu ya ka yoh ka kot kiwa im cha nongkyndong, ka puræ puthi, u pynyoh kreh ya ki khynroo khyllood, u pynpawnaam ya ka thaaiñ mihsngi, u yada ya ka rymaw wei wow pynbha pynmiat ya i chait i khiah wei da e pyrtuid ya kani ka Campaign – “Agenda for Northeast 2019”.

Yow pynku ya ka yoh ka kot kiwa im cha nongkyndong, ka Party u yaleh ko wow pynku ya ka rep ka riang hadooh ki rep soh wa kiwi kiwi kiwa embynta lang deiwa ym mylliñ leh yei emkaam u pynbiang ya ki thaw sumaar wa ki thaw puræ.

Yow yoh kreh ki khynroo, daw pynchlur wow wan ki bru samen wa kwah wow pynlut poisa yow pynku ya ka kaam uiñke suwari, kiwa kwah wow sdang ya ki thaw sah nadooh ki Hotel wa haka IT. Ka Party da booh thong ko wow pynemkaam ya ki khynroo khyllood kiwa da biang ka puræ puthi yow lait u sepai ki sap yong ki yow pynchlur hi leh ya ki yow yeiñ ki hei kjat yong ki hi yow lait u yang kreh sorkar.

Ka NPP da ong ko wa ka thaaiñ Northeast toh kawa mahajon ha i boon ki jaitbru, ki ktien ki thylliej wa ki dustur riti wa harukom wei emkaam wow yada ya ini waroh.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Heiyatoh won waka puræ puthi ka Party da ong ko lada ym yoh ya ka sika wa bha wa miat daw ktah ko ya ka roi ka paar wei na ini i daw da chah ieh ki bru yong i chadien. Kamtæ NPP da lai luti ko wow yoh u kynjoh ya waroh khamtam ya kiwa khian paaid ka ri. Lada ka ri toh u ku ko hap pynkhlan ya ka puræ puthi.

Ka NPP da kular ko leh wow pteiñ yei yaleh yong ka yow pynneh pynsah ya ka rymaw yow lait u chah ktah nei kylla i man ka suiñ bneiñ (Climate Change) kawa emkaam wow chimkhia nadooh katni neibynta ka juk wa daw wan. U pynchlur ya ki bru wow dam noh ya ki rukom khih kam ka rep Jhum heiwa thang yei khloo yow rep wa kiwi ki kaam wa ktah ya ka rymaw. U yada ya ka um, ka la-ær, ka khyndaw kawa da e sñiawbha ka bei rymaw cha i.

Heiyatoh won waka chait ka khiah ka Party da ong ko wa man ko kawa chem chitom ki bru ha waroh kawi ka jylla khamtam ya kiwa dooh wa duk kiwa sah cha nongkyndong kiwa da dooh ei yei mynsien neidaw wa em ki cha ki thaw wa jngai na ki thaw sumaar. Ka Party da ong ko wa u chimkhia ko ya kani ka kaam khamtam kiwa yatoh ki jait sumaar kiwa syad dor.