Ka lympung yalehke wa tip kam ka Open Basketball Tournament 2022 ka West Jaiñtia District Sport Association (WJDSA) kam chibynta i lehkmen yei dap 50 snem ka Association kamjooh ka jylla da sdang ya ka ynne i janmiet ha madan yaleh Basketball ka Thomas Jones Synod College, Jowai.
Ya kani ka lympung da wan wow wai pyrda da u L.D. Lakiang, Chairman ka Jowai Municipal Board, chirup i emlang u EMH Passah, Working President ka WJDSA, u District Sport Officer ka West Jaiñtia Hills u K. Passah, u Patrick Lamare, Vice President WJDSA wa kiwi najrong kiwa sikai ka Thomas Jones Synod College.
U EMH Passah da pynsñiaw u yei sñiawngooh ya ka sorkar jylla wa kynthup ya u Montri Rangbah wa u MLA ka Jowai hajrong i kyrchaan poisa neibynta kani ka lehkmen, da e khublei haroh u ya waroh ki liang wada wan ya chimbynta ha ki lympung waphær wa pynman daka WJDSA, najrong wa pyntip u wa daw pynman ki sa kiwi kiwi de ki jait yalehke Sport.
Kamtæ kyntu u ya ki khon khynroo ka ri-loom Jaiñtia wa hawa khut pynman ka WJDSA ya kawon kawon ka jait yalehke Sport, toh u mih ki chakhmat wow chimbynta yow pynyoo yei sap i phong ha kiwi tawon ki jait yalehke Sport leh ym deiwa yabeh du hei yalehbol.
U kongsan hawa klam da ong u ka Sport toh kawa kordor wei emkaam tam hei im uwi pa uwi u bru neibhah pynyoh ko yei doh i pran wa chait wa khlan. Heijooh i por pynkylla dur haroh ko yei im u bru la toh wa maya sakhiat yei Sport deiwa kreh chitom, neibhah najrong wa pynyoh ko i doh i pran wa chait wa khiah man haroh ko ka laad kamai ha kini ki sngi.
Hawa khyruiñ won u cha kiwa ya chimbynta, ong u haka yakhun em i jop wei rem, tangwa i chah rem leh toh iwa dei yakhun hi, na itæ i daw toh u chim wa i chah rem leh man ka laad wow ye u lehbha chooh chooh chakhmat.
Ki yalehke ynne ka sngi da pynman soo tylli kawa da sdang da ka Ladthadlaboh waka Newhill heiwa da jop da ka Ladthadlaboh da 45-19.
Ka Don Rua da jop ko ya ka Onyx da 72-25 wei ha kawa bood ka yalehke da jop ka Azriel ya ka SCB da 45-23 katwa ka Kingsmen da jop ko ya ka SASWJ da 43-35.
