Ka chnat Transport ka jylla Meghalaya deiwa ya krehlang waka yung krehkaam u DC, DTO, SP, DMHO waka PWD ka West Jaiñtia Hills District da pynman ki ya ka 34th National Road Safety Week/Month 2023 yow pynsñiawthooh yei emkaam u man kiwa syndong hawa yah kari kamjooh hawa lai wa wan ha luti syngkieñ deiwa bood ya ki kyndon ka aiñ.
Ya kani da sdang da ka yalang wa da pynman ha Iawpynsiñ Wahiajer ha ka 27 tarik uni u bnai deiwa emlang u DTO, u E. Lyngdoh, ki bru Enforcement wa kiwi ki wakreh u DTO deilang wa ki pulit, ki waheh chnong wa kiwi kiwi de.
Ha kani ka yalang da pynsñiawthooh ya kiwa boon ki kyndon wa hap wow bood hawa yah kari wei kamjooh iyi mut ki dak namo ki Sign wa da pynyieñ ha rood sarok wei da saam leh ya ki kot lakdop cha ki paidbah wa lai wa wan kiwa da khana ya chiboon wa toh u leh yow man i lai i wan iwa chngaaiñ kam i deiñ Seatbelt wei wow sap Helmet ya kiwa yah thuk-thuk.
Kawi na ki phang wa da pynkynmoo paidbah toh yei man kordor i mynsien bru ha kini ki por wa boon wa dooh yei mynsien bru nei ya tyrrah kari.
Ya kani ka jooh ka yalang da pynman ha Phramer wei daw pynman leh ha Iawmusiang, Jowai ha ka 29 katwa ha ka 31 tarik won daw pynman leh ya ka pynsñiawthooh paidbah hajan ka yung krehkaam u DTO.
