Jowai: Ka Scheme ka sorkar pyrdi wa tip kam ka Ude Desh ka Aam Nagrik (UDAN) kawa da sdang ha u snem 2017 yow e laad ya kiwa boon kiwa chong chnong u lai ki da Airplane hapyrdi ki chnong wa jan hei dor wa duna, u sdang pynkrehkaam ka Air Deccan ya kani ka Scheme deiwa pynman ya ka Shillong ka Airport wa hapyrdi yow hær cha Agartala, Dimapur wa Aizawl.
Hapoh kani ka Scheme i dor Ticket toh T. 2500 samen lada i jngai man i hapoh chikynta na iwi i chnong wa iwi dei hær. Hei sakhiat i dor ticket man i palat yeini tangwa ka sorkar won wow su ya iwa tam cha ki Airlines wa pynemkaam ya kani ka scheme UDAN.
Kamtæ ynne ka sngi ka Air Deccan da sdang ko wow pynkrehkaam ya kani ka UDAN heiwa ynne ka sngi da wan hiar ki Airplane ka Air Deccan ha Umroi heipor 10 waje i step kawa wan na Agartala, wei heipor 10:25 da hær ko wow lai cha Dimapur wei sa kawi won da wan ko na Dimapur cha Shillong heipor 12:30 pyrdi sngi.
Heipor 12:45 won da hær sa kawi ka Airplane na Shillong cha Agartala.
Neiliang u montri rangbah ka jylla u Conrad Sangma da e khublei u ya ka Air Deccan wei da pynsniaw u leh yei sniawngooh ya ka sorkar India khamtam ya Ministry of Civil Aviation kiwa da wanrah ya kini ki Airplane hapoh ka UDAN.
Discussion about this post