Sdang ka Seiñkur Rymbai Pamrapaithlu yei lehkmen dap 25 snem

Ka Seiñkur Rymbai Pamrapaithlu ynne ka sngi da wai pyrda ko yei lehkmen dap 25 snem i lai luti wei daw pynkut ya ka lehkmen namo ka Silver Jubilee Celebration ha ka 11-04-26.

Ha kani ka sngi da emlang u Lasky Rymbai uwa man kam u Deputy CEM ka JHADC, kam u kongsan wa u Damewanhi L Rymbai uwa man u President ka Seiñkur Rymbai Pyllun kam u symbood kongsan deiwa chimbynta chitrhem da ki khon ka kur wa kynthup nadooh ki khynnah, ki khynroo khyllood, ki manbei manpa, ki kni, ki ma wa ki woh.

Ya ka yalang da pynlai u President kani ka chnat ka kur, u Romius Rymbai heiwa da yoh yei parom wa tbian ka seiñkur na u Leningstar Rymbai wa i ktien pdiang na u Hilesh Rymbai uwa man u Organising Secretary.

Neiliang u Lasky Rymbai hawa e yei klam da yaroh u ya ka kur Rymbai Pamrapaithlu wa dapoi ko cha uni u moomær ka Silver Jubilee deiwa ong leh wa kani man ko ka nongmuna ya kiwi wow bood ki wow chimkhia ya kini ki kaam neibhah wa emkaam wow burom ya ka dustur riti yow lait u pra ka manyung.

Related posts

Da rah tarik ya ka General Meeting ka Kur Sana kawa daw pynman ha Jowai

May 7, 2025

Ym chah ya kiwa wan dai baam ha ka Chaad Sukra ka Seiñraij Chnong Tuber Kmaichnong

May 3, 2025

U Damewanhi L Rymbai da ong u wa i kaam kur toh kawi na ka dorbar wa kyrpang hapoh ka Bri U Ynñiawtrep wa maya yong i, wei da yaroh u ya ka JHADC wa ha kini ki kajiak bnai wa dadep yong u snem 2024 wa da khut da wer ko ya ki kur wa haap hapoh i pait yong ka hapoh ka Jaiñtia Hills waroh kawi wow wan pyntipmit ki ya kiwa kitkaam kur.

Kamtæ da yooluti u wa ha uni u snem hapoh ka EC wa thymme daw ye wow pyndep ya kani ka kaam khnang wa ki kur tre ri daw yoh ki yei tipmit wa pura hapoh ka JHADC.

Chooh chooh da ong u wa kam u President kwah u wow kyntu ya waroh wow pynwiar pyndooh noh yei adnood, yei bichni deiwa wanrah yei yatylli.

Ha kani ka sngi da yoh leh yei klam hajrong ka phang pyrdi namo ka Theme wa da booh da ka Seiñkur Rymbai Pamrapaithlu kawa ong, “Di Maia Chaphrang U Tia”.

Kiwi de kiwa e yei klam sneiñ kyntu toh u Emil Rymbai, u Ram Rymbai, u Barius Rymbai wa kiwi.

Hadien wa pynhær lama Silver Jubilee da u Lasky Rymbai, da pynlait leh ya ka sur Silver Jubilee wei da saam paidbah ya ka lama Jubilee da u symbood kongsan.

Yei rwai pdiang burom da yoh na ki khon khynroo ka kur kitæ u Safemon Rymbai wa ka Phida Rymbai wa i chaad tynre na ki manbei ka seiñkur.

Ya ki kyntien khublei da e da u Safemon Rymbai.