Ka e sikai mynkna neibynta wow man kam ki Data Entry Operator hapoh ka Skills Meghalaya, kawa da kyrchaan poisa daka Meghalaya State Skill Development Society (MSSDS) u sdang noh yaka hapoh ka West Jaiñtia Hills District ha kawi naki thaw e sikai Computer ha Jowai wa tip kam ka Jaiñtia Institute of Technology (JIT).
Kani ka e sikai u sdang noh ko nadooh ka 23 tarik uni u bnai, wei ka e sikai (Course) toh hapoh 3 bnai.
Haka yalang wai ya kani ka e sikai ynne ka sngi, u Lambormi Suchen uwa man kam u Skill Development Officer naka yung krehkaam ka Meghalaya State Skill Development Society ong u wa kani ka Skills Meghalaya toh ka thong wada mang ka sorkar u sdang e sikai waphær waphær neidaw wa chynna ko yei saja ki khynroo u yoh khih yoh kreh khamtam i kreh sorkar.
Sei wi leh wym mut du kat u e ka sikai næ ka Skill Training tangwa kam kiwa chimbynta najrong wow ye ki u sdang yei khih i khan u man haroh ki kam kiwa e khih ya kiwi tawon.
Kamtæ lyngba kani ka e sikai da yooluti u wa kiwa chimbynta leh u chimkhia ki yow ye ki u leh kawon kawon ka kaam pynmih poisa wa ye u yarap yaka mynried yong ki.
Najrong i e sikai mynkna pyntip u wa daw pyrchang pynyoh khih wei wow yarap haroh kammon u seiñ khih ki.
Heiyatoh i jied ka sorkar yaka Jaiñtia Institute of Technology (JIT) pyntip u wa toh ka sorkar yoo biang ko ka najrong wa da boon leh ki khynnah wa e sikai ko.
Neiliang u Managing Director ka JIT, u Bankitbor Marweiñ hawa pynsñiaw yei lai luti kani ka thaw e sikai neibynta u e i tip i stat Computer, khana haroh u wa da pyrchang ko u lailuti heiyatoh wa kammon u yarap pynyoh khih manda dep puræ ki khynnah heini.
Kamtæ kyntu kyrsu u ya waroh ki khynroo naki chnong waphær waphær ka District u chimkhia ki ya kani ka laad ka kabu wa da yoh dei wow wan tikna cha ka e sikai wa 400 kynta hapoh ki 3 bnai.
Kiwa kwah wow yoh ya kani ka e sikai dang ye ki wow wan chakhmat.
