Sdang ka sorkar yei e sikai pynemkaam Drone neibynta ka GIS & UAV Centre

U Montri Rangbah ka jylla, u Conrad Sangma, ynnin da wai u ya ka GIS & UAV Centre ka jylla haka yalang wa da pynman ha Secretariat yow pynman yaka jylla kawa nyngkong dooh wa em ya ka yong ka hi ka GIS & UAV Centre ha ka thaaiñ.

Nachwa da paan yarap ka jylla naka North East Space Application Centre (NESAC) yow chim yukheiñ ya ki thaw ki bhaw na suiñ (Geospatial Data). Tangwa neidaw ka NESAC chakri ko ya waroh kawi ka Northeast, kamtæ ym ye ko wow e yarap man-i-por yeiwa emkaam ka jylla.

Deiwa em kani ka GIS & UAV Centre daw yarap ko wow leh ya waroh ki kaam wa emkaam wow tip chwa u sdang wei yow tip leh u pynkhreh chwa u sdang ki kaam pynroi ka sorkar.

I lum yutip chaphang ka thaw ka bhaw (Geographic Information System) deiwa pynemkaam da ki Drone namo ki Unmanned Aerial Vehicle (UAV) toh kiwa da dep pyrchang chwa hapoh ka jylla wei da leh ya ini ha waroh ki kreh wa da yoh na baar namo ki Externally Aided Project kam ki yong ka IFAD neibynta ka LAMP, kawa yarap da ka World Bank neibynta ka CLLMP waka JICA neibynta ka Meg-LIFE kiwa waroh da pynemkaam ya ka GIS yow pynkhreh yow sñiawthooh yei thaw i bhaw chwa wow sdang yei kreh.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Deiwa yarap kini ki Drone da ye wow chna ya ki Map yow tip kammon da pynemkaam ya ki thaw, iyi wa em ha kini ki thaw nadooh ki loom ki wah wei yeini da dep wow leh ha 2360 tylli ki chnong iwa da yarap wow sñiawthooh hawa pynkrehkaam ka sorkar ya kini ki kreh namo ki Project.

Ya ki Drone da pynemkaam bha ini wa dep heipor wa joor ka chlai um heiwa da tip smat kiwon ki thaw wa chah ktah, da pynemkaam leh ya ki yow chem ya kawi pa kawi ka yingkieñ jri kam chibynta i yaleh ka sorkar yow tipmit da ka UNESCO ya ki kam ki World Heritage Site. Ini wadep ka sorkar da sdang ko leh wow kit dawai deiwa pynemkaam da ki Drone yow pynpoi ya ki dawai kiwa chitom u lai da ka kari.

Ka sorkar leh da sdang ko wow e sikai ya 23 ngut ki bru wow pynemkaam ya kini ki Drone yow yoh kreh ki kamjooh ki bru wow leh ya ka GIS wei kani ka GIS & UAV Centre toh kawa da booh hapoh ka MBDA.

Ka sorkar da pynkhreh ko leh wow sdang ya ar tylli ki Remote Pilot Training Organization (RPTO) kawa daw man kawa nyngkong dooh hapoh ka jylla wow e sikai wei wow e Certificate ya ki Drone Pilot deiwa e leh ya Drone Pilot License cha ki wei ini daw pynyoh kreh ko leh ya kiwa boon ki khynroo ka jylla.