Ka tayaaw lehkmen ka Dorbar Chnong Chilliangraij wa tip deiwi i kyntien kam ka Chilliangraij Week da sdang ya ka ha ka 17 tarik uni u bnai wei da wan wow wai pyrda ya ka da u Philemon Lyngdoh, MDC warim ka JHADC hei emlang u D.H. Pde kam u waheh chnong ka Chilliangraij, ki waheh wasian, ki manbei manpa wa ki khon khynroo khyllood ka chnong.
Ha ka yalang wai pynemwarom ya kani ka tayaaw lehkmen kawa da man hei pynlai ka G. Pde, da yoh i klam e mynsien wei sneiñ i kroo ya ki khon ka chnong na u waheh chnong, u D.H. Pde, u Oriland Shylla, u General Secretary wa u Lamphrang Shylla uwa man u Secretary ka Arts & Culture Committee.
U Philemon Lyngdoh hawa klam kam u kongsan chwa wow wai ya kani ka tayaaw lehkmen ki khon ka Dorbar Chnong Chilliangraij, da e u i sñiawngooh wa khroo ya ka Dorbar Chnong wei da yaroh u leh ya kiwa kitkaam ka chnong kiwa da chimkhia u pynman ya kani ka lehkmen neibynta i myntoi ki khon ka chnong waroh wei kitbok kitrwiang u leh wa kani ka tayaaw lehkmen u man ko kawa lai bait lai ryntih dei yakrehlang kiwa ya chimbynta wa ki bor watoh u pait u pynlai ya ki kaam waphær waphær.
Chooh chooh da pynphooh pynphieñ wei da pynchongchit ya kani ka janmiet da ki lehke pynka’it kam i rwai, i chaad kiwa da ya chimbynta da ki manbei manpa, ki khynroo khyllood wa ki khynnah.
Ya kani ka tayaaw lehkmen u pynkut ha ka 31 tarik uni u bnai ha Yungwalieh kam chibynta i lehkmen wow pdiang ya u snem thymme wei daw em leh i saam ya ki khusnaam cha kiwa jop yong ki yakob waphær neitæ i pynkup burom ya ki khon ka chnong nadooh ki khian hadooh ki heh kiwa poi chakhmat ha ki kyrdan puræ waphær waphær.
