Ka School Managing Committee yong ka Loompyrdi Iongpiah U.P. School, Jowai ha ka thong wow yoh laad ki khynnah u sai u pynyoo pyntaw sap najrong i puræ puthi, ha kani ka sngi Hat 21 tarik da pynman ko ya ka 13th School Week ha Yungwalieh ka Loompyrdi Iongpiah.
Ya kani ka School Week da wan wow wai pyrda da u Hercules Toi, President Seinraij Jowai kam u kongsan katwa u C.A. Ram Kyndiah, Secretary SMC daman u kam u symbood kongsan hei sakhilang u Bimi L. Suwer, General Secretary Loompyrdi Iongpiah, ki dkhot ka School Managing Committee wa kynthup yow W. Challam wa u K.F. Laloo najrong kiwa sikai wa ki khynnah skur.
Ha ka yalang yahkhmat yong kani ka sngi hei pynlai ka Dariker Lato, Asst. Teacher da yoh i klam pdiang burom na ka Sanki Toi, Asst. Headmistress neitæ i ngoohblai ngoohsyiem na u B.M. Shylla, Asst. Teacher katwa ki kyntien e mynsien won ya ki khynnah kamjooh ya kiwa sikai da pachat na u C.A. Ram Kyndiah, Secretary SMC kamjooh na u Hercules Toi kam u kongsan yong kani ka sngi.
U Hercules Toi hawa klam, da kyrsu kyntu u ya ki khynnah wow man kiwa chlur u ya chimbynta ha kiwon kiwon ki yakob deiwa booh ya itæ i sñiaw sarom næ sñiaw sahdien cha rood, neibhah kani toh ka tyngkong ka laad ka kabu ksiar wow tip u sñiawthooh phi ya itæ i sap i ka-it wa em ha phi.
Chooh chooh kyrsu kyntu u leh wow man ki khynnah wa tip u kheiñkor yei por wa kordor wei wow ri syndong yei burom i akor wa man ka spah wa khroo yei longbru manbru kamjooh ya ka yung ka sem. Iwa khaddooh ong u ya ki khynnah wow man phi ki bru kiwa ye u poi cha ka thong yong i naam wa i burom, toh u man phi kiwa em ka mynsien yaichah, u kut yumut wei kreh chitom.
Neilang ka Nitu Chullai, Head Teacher Loompyrdi Iongpiah U.P. School da khana wa ha kani ka School Week næ tayaaw lehkmen u em chiboon ki jait yakob wow yoh laad ki khynnah u pynyoo pyntaw sap wa ki rukom lehke pynwyrngia chongchit waphær ki wow pynkmen pynka-it yei man i sñiaw ki khynnah wei ka ya kani ka School Week u pynkut ha ka sngi Musiang 25 tarik Naisaphra.
Discussion about this post