Ka skur Government Girls’ Higher Secondary School Jowai kam chibynta i pteiñ lehkmen yei dap 50 snem i lai luti ka skur, ynne ka sngi da sdang ko ya ka tayaaw lehkmen ka skur wa tip kam ka “Spirit week, one journey, many stories” wa pylnai da ka Arts and Cultural & Literacy Committee ha Auditorium ka District Library w em ha Mynthong, Jowai.
Ya kani ka tayaaw lehkmen da wan wow wai pyrda ya ka da u O.R.Challam, President warim ka Seiñraij Jowai, uwa da e leh i yaroh ya kani ka skur wa da nang ku ko neipor cheipor hei puræ puthi, najrong wa yaroh u leh ya ka sorkar MDA kawa da yaleh u pynku ya kani ka skur wot heiliang u wanrah i tei i chna ya ki Building.
Hawa yaroh yei kreh chitom kiwa sikai kani ka skur, kyntu u leh ya ki wow man kiwa pynkhreh ya idæ heiyatoh waka National Education Policy hanla ym pu em pynkrehkaam ka sorkar jylla.
Ong u sam chaphrang iwa rap khor ya kiwa sikai tangwa kani ka NEP heipor wa tbian ye u ong wa khor tangwa hadien won man kawa biang tam neibhah yoh myntoilang nadooh ki khynnah wa kiwa sikai.
Heiyatoh wa ki khynnah skur won kyntu u ya ki wym toh u chim ki wa i pynkhor kiwa sikai ya ki toh wa kynchiñ ki, tangwa toh i maya khnang yow miat u bha ki ya ki hi deiwa e nongmuna u kam iwa jooh pynkhor kiwa sikai yei pynemkam Phone hapoh ki soodong sookun ka skur.
Da pynkut u yei klam deiwa ong, iwa sdang hi boonsien man iwa eh wa khor, tangwa leh yeiwa bha man-ka-sngi, wei lada ym em kiwa yaroh leh sñiaw sarong ya idæ.
Neitæ i tip u man kiwa emakor yah ko cha ka thong i yoo jngai wa da angnood da yooluti.
Ngait skem u leh wa ini i lehkmen dap 50 snem ka skur u man kawa hakhmat dooh wei iwon iwon wa em hapoh yong ka toh u booh sahkynmoo dei thoh khnang yow tiplang ki wym ye u emlang.
Ha kani ka sngi sdang ka tayaaw lehkmen ka skur, neiliang ki khynnah skur leh da chimbynta ki u pynyoo sap ha ki jait yakob wapher waphær nadooh i yakob rwai, i yakob leh Debate wa kiwi.
Discussion about this post