Ka Khynroo Khyllood Committee yong ka Loompyrdi Iongpiah, Jowai haka 10 tarik da wai pyrda ko yaka tayaaw lehkmen leh sñiawbha kawa da pynman ha madan Mynkoipyrdi Iongpiah hapyrdi i sakhilang ki manbei manpa wa ki khynroo khyllood.
Ha ka yalang yahkhmat yong kani ka sngi hei pynlai u Bimee L. Suwer, Waheh Chnong ka Loompyrdi Iongpiah, da yoh i ngoohblai ngoohsyiem na u Ram Kyndiah, Secretary Education Committee katwa ya ki kyntien kyrpang yong kani ka sngi da yoh u ap u sñiaw nei klam i kappæ yong u K.F. Laloo, Ex-Waheh Chnong Loompyrdi Iongpiah wa man kam u symbood kongsan wa na u Wander Shylla, Ex-General Secretary, Loompyrdi Iongpiah wa man kam u kongsan yong kani ka yalang wai pyrda yaka Loompyrdi Iongpiah Week 2023.
Ka Organizing Committee yong kani ka Week haka thong wow pynjanai yei rukom krehkaam da chna ko ya ki soo tylli ki dhab næ Group kiwa da tip pyrtuid kam ka Latuthin, ka Lasyntem, ka Lasubon waka Jaluba wei da booh ko leh ya ka Theme næ ka mat kyrpang yong uni u snem kawa ong ‘Nongrim da sikai ya i u Yachankylliang-Chirup Chilang u Tia Chaphrang.’
U K.F. Laloo hei klam yong oo da yaroh u yei chynna jngai kiwa yahkhmat ka Dorbar Chnong chirup wa ki khynroo khyllood wow pynman ya kani ka lehkmen wei da ñiawtang u leh wow kynmoo tamdien ya ki por wa da lai kiwa ka dong ka chnat, u loom u pdeiñ em ki hapyrdi i kylla kamjooh leh wow kynmoo burom kynmoo maya ya ki khon ka dong ka chnat ki wym em de chirup heini ha sla khyndaw pyrthai kiwa da yakit yabah ya ka lyngkor i miat i bha yong ka imlang sahlang.
Chooh chooh kyrpang leh kyrsu kyntu u ya ki khon khynroo khyllood deiwa ong, man ki pateiñ kiwa imsngi u boodlate yeiwa ki waheh wasian, manbei manpa kani ka juk ka por pynyoo wei sikai ki khnang wa ka mynried ka yong phi kamjooh ka yong u loom u pdeiñ u man ko kawa em naam em burom.
Neiliang ki khon khyllood ka Loompyrdi Iongpiah kam chibynta wow pynka-it pynwyrngia ya kiwa wan sakhilang da pynyoo ki leh yei chaad pliang hei riam i bait wa yoo chongkun chongkhia wei phooh i phieñ.
Kam ka dak i sdang yong kani ka Loompyrdi Iongpiah Week 2023, u Wander Shylla kam u kongsan yong kani ka sngi hadien i klam i kappæ yong oo da pynhær u leh ya u Diñ Kum.
Discussion about this post