Ka Iran ynne i step kam chibynta wow tput yei chah tynyap u heh chipai yong ka ha ka America da siat bom (Rocket) ko ha ki ktem (Airbase) ka America wa em ha Al-Asad wa Irbil, ka ri Iraq.
Neiliang ka Pentagon da ong ko wa ka Iran da siat ko palat chi dorjon ki bom.
Neiliang ki heh chipai ka Iraq da ong ki wa ha ini i chah siat bom ym em u chipai yong ka uwa yap.
Ya kini ki bom ka Iran da siat ko hapyrdi 1:45 am hadooh 2:15 am (namo 2:45 IST hadooh 4:15 IST).
Ki heh chipai ka Iraq da ong wa waroh ki bom wa da siat em ki 22 tylli, 17 toh wa da mang ya ka Ain al-Asad Airbase katwa 5 tylli won ha sor Arbil.
U Assistant to the Secretary of Defense for Public Affairs ka America, u Jonathan Hoffman da ong u wa ya kini ki bom da siat na Iran wei da mang ya ar tylli ki ktem chipai ka America wa ki lok yong ka ha Al-Assad wa Irbil.
Hadien ini neiliang u Foreign Minister ka Iran, da ong u wa yeini da leh ka Iran kam wow yada pyn yaka hi katkam ka Article 51 yong ka UN Charter wow mang ya ki thaw wa da leh ya ki kaam tieñslah wow tynyap ya ki bru ka Iran.
Da ong u leh wa ym kwah ki wow pynheh namo u pynjoor ya ka thma tangwa da leh yeiwa emkaam khnang wow yada pyn ya ka ri yong ki hi.
Mar jia ini, u President ka America, u Donald Trump da kam u wa da siat ya ki bom na Iran ha ki ar tylli ki ktem chipai ha Iraq tangwa ym em i dooh ya ki mynsien wei dang antaad ya i chah ktah ha kini ki bom.
Ka Iran ha kani ka tayaw da rai ko wow tput yei chah tynyap u heh chipai yong ka, u General Qasem Soleimani ha ka US ha Baghdad ha ka 3 tarik uni u bnai.
Discussion about this post