Ka Woodland WK Hospital wa em ha Sabah Muswang da sñiaw sarong ko u pynbna wa da ye ko u pynkha khon iwa khlem sñiaw yei kjut kawa man ka sien kawa nyngkong dooh wa ye u leh kamni hapoh ka West Jaiñtia Hills District.
Yeini dadep wow leh ha ka 17 tarik uni u bnai Wisu (March) 2025, heiwa da kha ya iwi i khon kynthai iwa chait wa khiah deiwa kha suk ryngkat i yarap ka ‘Epidural Analgesia’ ka rukom (Technique) thymme kawa e laad ya ki bei wa punkhon u kha khon, deiwa maad du malu mala donhi i kjut, hawa sooh khon.
Kani ka rukom pynkha khon wa khlem kjut (Painless Birth-Epidural Analgesia) da leh da ki Doctor Anaesthetist deiwa Inject na budloom ha i bynta u tympong ka bei, yow booh ya u kynja Pipe khian (Catheter), wei lyngba utæ daw e Inject yow lait u kjut manda sooh khon. Kani ka rukom da pynduna ko chiboon yei kjut manda sooh khon, wei e laad ko kamjooh ya ka bei yow tip yong bru ko wei yow ye ko u kyan manda toh u kha khon.
Najrong wa pynduna bha yei kjut hawa sooh khon, kani ka rukom pynkha khon yarap ko ya ka bei wow yoh ko u chong ngiah, yow seiñbor yow ye u kyan manda toh u kha wei yow yoh u kha dei suk. Yarap bha ko khamtam ha kitu kiwa slem, wei kitu kiwa chem jynjar wow kha (Long and Complicated Labour).
Kani ka rukom pynkha khon toh kawa man chngaaiñ ha kti ki Specialist kiwa dadep pynpliah wow leh ya kani ka Epidural Analgesia wei ym em i maa ya ka bei kamjooh i khon wei man ko leh kam ka Standard Practice, ka rukom wa da leh salonsar ha kiwa boon ki Hospital ha ki ri wa da che.
Tangwa ymtoh waroh wa ye u leh da kani ka rukom pynkha khon neibhah da emkaam chwa wow pait u sylli da ki Doctor neidaw wa em ki manbei wa em kjut heipor wa kha khon, kiwa khian ka luti kha wa kiwi de kiwa pynkyllaiñ (Complications) kamtæ ym hoi u leh da kani ka rukom. Katwa kitu kiwa biang lut nadong chadong, toh ka laad kawa bha wei miat bha u kha khon.
Hei yoh u yaklam wa ka manbei wa nyngkong dooh wa da chim da kani ka buit ka stat pynkha khon thymme neibynta i khon wa 3 yong ka, da khana ko wa man sakhiat iwa pynduna yei sooh, hanla rap chimpor ko neiwa jooh kha ko.
Wei hei chem yong ka ym em iwon iwon i sñiawphær næ sñiaw chitom ko lait noh du i kjam donhi wa joor hadien wa dep e Injection neidaw wa dait thah i doh, tangwa hadien won manda chit won sñiaw ko da man biang kamwa jooh hi.
Wei nadooh wa mih Hospital ko hadooh kattæ man ko kawa chait wa khiah hi neibynta yong ka hadooh i khonboo.
Neiliang u Dr. Lawiki E Shullai, Obstetrician In-Charge, da ong u,“Kani ymtoh i jop du heiliang ka stat dawai (Medicine), tangwa toh i ku chi rna deiwa rap bha, deiwa yoh myntoi neibynta ki bei wa punkhon yong ka District yong i. Waroh chi kattu ki kynthai da chah ki yei kjut wa joor heipor wa sooh khon ki, khlem da em wa ye u pynduna yeitæ. Katni won nadooh wa em kani ka Epidural Labour Analgesia, da ye u tyrwa cha ki bru ya ka laad katkam i stat Science yong ka juk kawa katni, kawa ha ki ri kiwa da che da ya bood bha ki ka kawa man leh kawa bha, wei kawa krehkaam kamjooh.”
Da ong u leh wa e laad ko ya ka bei u tip yong bru ko, u sñiawthooh bha ko ya ka katæ ka lai luti yow kha dei bor ko, deiwa suk, khlem da hap chah yei kjut wa joor, hawa sooh khon.
U Dr. Aiar D Sangma, Anaesthetist, da ong u, “Ka Medicine toh ka Subject kawa nang kylla cheiwa rap bha neipor cheipor, kamtæ i rukom sumaar leh da nang kylla chooh chooh ki khnang yow wanrah i chakri wa rap bha wei wa rap miat cha ki paidbah waroh. Ka Modern Medicine ngait ko wa u kha khon khlem sñiaw yei kjut toh ka hok tynre yong waroh ki kynthai wa pun khon. Ka Labour Analgesia toh ka rukom yarap ya ka kynthai wa sooh khon yow pynduna næ wow pyndam yei kjut iwa joor wa ki kynthai hap maad ki hawa kha khon. Kani ka rukom hao sakhiat ymtoh kawa dang thymme hiwot, neibhah da jooh batai ya ka nadooh ki por warim.”
Da ong u leh wa ka Neuraxal Labour Analgesia, khamtam ka Epidural Analgesia da thoh ya ka nadooh ki snem 1900-1930, wei kajooh ka rukom (Technique) da rap pynbha chooh chooh ya ka, heiwa ha ki sngi kiwa katni da kheiñ ka kam ka Gold Standard namo ka rukom wa hap wow bood yow e yei kha khon khlem kjut ka bru.
Da pynkynmoo u leh wa kani ka rukom toh kawa bha wei ym em pynsih i ya ka bei wa i khon wei wan ko ha i dor wa duna.
Da pyntip paidbah leh wa ka Woodland WK Hospital em ko ki Doctor Specialist Kynthai wa Specialist ya kiwa pun wa kha (Obstetrics & Gynaecology) wa kynthup ya ka Dr. Merciful Shylla, ka Dr. Wilanika Bamon wa u Dr. Lawiki E Shullai (kam u Visiting Consultant), kamjooh ki Anaesthetist kiwa kynthup ya u Dr. Aiar D Sangma wa u Dr. Dipankar Hazarika.
Discussion about this post