Ka Seiñ Khynroo ka Dorbar Chnong Khim-u-sniang kam chibynta wow lehkmen wei wow sdang ya ka tamasa ki khynroo namo ka Youth Festival da pynman da ka yaphet thong namo ka Marathon hei step ka 27 tarik uni u bnai wa da wan chimbynta da 63 ngut ki khynroo khyllood kamjooh kiwa da heh.
I thmu wa kongsan kani ka tamasa toh wow lehkmen wei wow pynchlur ya ki khynnah wa ki khynroo khyllood ha ki kaam yalehke wei leh wow pynmyllien ya idæ ha ki kaam wa bha yow yoh yei chait i doh i pran.
Kani ka Youth Festival toh kawa daw pteiñ hadooh ka sngi nyngkong u snem thymme wei daw pynman leh ya kiwi ki jait yakob kam ka Badminton, Table Tennis, Football wa kiwi kiwi de.
Ha kani ka yaphet Marathon ha ka kyrdan hapoh 12 snem ki kynthai, da jop ka Mandakaru Sariang katwa ha ki chynrang da jop u Allan Angelo Jat.
Ha ka rta 13 hadooh 15 snem i rta da jop u Precious Nongpluh.
Ha ka 16 hadooh 44 snem ki kynthai da jop ka Famydore Patwet katwa ha ki chynrang da jop u Rimiki Paslein.
Ha ki 45 snem chaneiñ da jop ka Dr. Bisolin Dhar katwa na ki chynrang da jop u Kumarban Pde.
Ha kani ka sngi da e leh ya ki khusnaam wa kyrpang ya u Daemitre Lypon (60 snem) wa ya ka Sawakani Lytan (5 snem).
