Sdang ki nong Bangladesh wow Boycott ya ki mar wa wan napoh India

Hadien wa da jia ha Maldives wow dam u thied ya ki mar wa mih napoh ka India, da jia i jooh sa ha Bangladesh deiwa pynman da ka lai yalap wa tip kam ka ‘India Out’ waka ‘Boycott India’ ha ki rynsan Social Media deiwa pynbaad wa luchia ka India ha ka Election wa dang dep pynman ha Bangladesh.

Ki bru ha ki rynsan Social Media da sdang ki da ki Hashtags wa ong ‘Boycott Indian Products’, ‘Boycott India’ wa ‘India Out’.

Ini da ktah ko ya kawi na ki Company wa pynmih mar wa boon jait ka India wa tip kam ka Marico heiwa ki dukan kiwa jooh dai yei mar ki, da sdang ki wow kyntait u booh ki hapoh dukan.

Ka Marico toh kawa chna yaka Parachute Oil, ki phñiang baam kam i Saffola, ki dawai biah khmat, ki phñiang biah sñiooh kam i Livon, ki Shampoo, ki sabon Mediker wa kiwi kiwi de.

Related posts

Em 151 tylli ki kreh wa thylli, phah u Wailad ya ka DSC wow thooh lada dang em chooh kiwa wa lait

May 16, 2025

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

I mar wa lai yaaw dooh toh i Parachute Oil iwa da hiar katni chei nod ha kini ki tayaaw wa dep neidaw wa ki bru leh da sdang ki wow dam u thied ya ki mar wa mih napoh India we ini da pynman wa ki mar warim leh ym pu em ye u dai lut ki.

Kiwi ki bru da ong ki wa da ngait ki ya ki YouTube Video wa da pait ki kiwa da kyntu ya ki paidbah wow dam u thied ya ki mar wa da pynmih na India.  

Hadien ka Election ka Bangladesh ha u bnai wa dep heiwa ka Sheikh Hasina da man Prime Minister biang ko ha ka sien wa soo heiwa kiwa boon da Boycott ki ya kani ka Election khamtam ka Bangladesh Nationalist Party wei kiwa thap Vote leh da mih ki du kamwa 40% donhi iwa da pynman yaka Party ka Hasina, ka Awami League wa ki lok ki wow jop 225 na 300 tylli ki Parliamentary Seat.

Kamtæ da em i sñiaw da kiwa boon wa ka India da muchlia ko haka Election ka Bangladesh neidaw wa ka Hasina toh kawa yajan bha waka India deiwa pynbaad wa ka India ym kwah ko wow em da kiwi wow ksoh yei bor ha Bangladesh.

Ki nong Bangladesh kiwa em ha kylleiñ ka pyrthai kam u Pinaki Bhattacharya uwa da yut napoh ka ri u da pynchit u yeini deiwa pynchlur ya ki paidbah wow Boycott noh ya ki mar wa mih napoh India wei em leh kiwa pynchongchit niam deiwa pynkynmoo yeiwa jia ya i thaw mane ki Muslim ha India.