Ka Fit India Movement toh kawi na ki thong krehkaam wa da mang kyrpang ka sorkar India heiyatoh wow pynman ya ki bru wa chong chnong kiwa em yei dooh i pran, i thij i pyrkhat, i long i man wei kamjooh ya ka spah mynsien wa chait wakhiah. Kamtæ hajrong kani ka thong ka sorkar India ha u snem 2019 yong ka 29 tarik Naisaphra da sdang ko ya kani ka Movement deiwa pynman ki yalang waphær ya waroh wa kynthup nadooh ki khynnah wa em ha ki thaw puræ, ki paidbah wa kiwi kiwi ki bru næ ki seiñ kiwa em ha ki kyrdan waphær.
Ha uni u snem neibynta ki thaw puræ ka sokar India da booh da chna ya ki kaam wa kyrpang neibynta ki khynnah skur kiwa da sdang nadooh u Thohlakhmi (February) wei ka wow kut hadooh u Kmaichonglad (December) kawa datip deiwi i kyntien kam ka Monthly Wise Calendar Fit India Movement in School 2021.
Kamtae ha ka thong yong ini, da sakhi wa hapoh ka District leh ki skur SSA ha ki kattu katni tylli ki chnong da chimkhia ki wow pyndep ya ki bynta kani ka thong kiwa toh u pyndep ha uni u Wisu (March) wei hapoh ka chnong Jowai ki skur kiwa da yoh u sakhi yei pyndep ya ini ha u Wisu toh ka Chilliangraij SSA UPS wa ka Panaliar UPS SSA.
Neiliang ki Head Teacher yong kini ki skur ha ka yalang yahkhmat da kdar ki wow klam u batai pynche pynsñiawthooh ya ki khynnah hajrong ka thong yong kani ka Monthly Wise Calendar Fit India Movement in School 2021 wei da kysru kyntu joor ki yaki khynnah wow ya chimbynta deitæ i mynsien sñiawkhia iwa man i myntoi yei man i long yong phi samen samen kamjooh yei burom ka skur waroh kawi.
