Jowai : Ka thaiñ East Jaintia Hills District man ko ka distrik heiwa boon bha ki bru kiwa im wei kamai nei tih mooyong hachwa wow khang ka NGT wow tih ya uni u mar por khyndaw hapoh ka jylla. Tangwa ini ym em u pyndooh mynsien i ya ki bru ka thaiñ neibhah wa da yoh u sakhi wa boon ki bru da sdang ki u kyruiñ cha i rep i riang.
Yeini waroh da yoh u sakhi haka Exhibition wada pynman daka ophis District Horticulture East Jaintia Hills District Khliehriat ynnin ha Khliehriat West Community Hall. Ha kani ka sngi da yoo wa ki paidbah yong katai ka thaiñ da sdang ki wow chimkhia yei kaam rep neibhah ki mar rep kam ki jhoor ki soh ki syntu wa kiwi kiwi man ki kiwa sbooh kiwa plung bha.
“i tih mooyong da khang wei i kamai da man i iwa hiar kamtæ i wan ka Horticulture man i kabu wa bha ya phi ki paidbah neibhah wa lyngba i sikai kani ka tnat ye u pynmih boon chah ki mar rep mar riang weiwa i bor wow ye u pynmih boon ki mar ym chong i hei bor samen tangwa hei yakrehlang chirup” da ong u G.Dohliang District Horticulture Officer, EJHD, Khliehriat.
“I kaam rep kaam riang namo i ri mrad waroh da tip wa ha East Jaintia ki bru ym rap chimkhia ki dang nachwa neidaw wa boon hi im ki lyngba u mooyong weiwa i khih mooyong ym man i iwa neh chi rta tangwa i kaam rep won man i iwa neh chi rta weiwa pynyohmyntoi bha ko” da ong u Deputy Commissioner East Jaintia u ma W.R. Lyngdoh.
Heiwa da kyntu u leh ya kiwa rep wow chim kabu ki yei yarap wa yoh ki lyngba ka tnat Horticulture weiwow chimkhia leh yei kaam rep yow wanrah yei roi i par hapoh ka jylla.
Ka kong V. Lyngdoh MDC ka thaiñ da ong ko wa i kaam rep kaam riang man i iwa kongsan tam iwa ye u pyndap pynbiang ya iwa emkaam ki lada ha yung næ ha lait.
Ini i pynyoo naam yaki mar rep da man i ar sngi wei da saam leh ya ki khusnaam cha kiwa jop kiwa da wanrah ya ki khontara, ki sohjaw pnar, u chyrmit, ki syntu wa kiwi kiwi.
Ha kini ki sngi da yachimbynta da ka tnat Agriculture Khliehriat, ka Meghalaya Spices, ka Mukhap Handloom and Handicrafts Multi Purpose, ka Krishi Vigyan Kendra Jaintia Hills District Department of Agriculture Government of Meghalaya.
Discussion about this post