Ka Voice of the People Party da sdang mih i kynrum kynram hapoh yong ka hadien wa poor iwi i Video wa emlang u MLA ka Party na North Shillong, u Adelbert Nongrum deilang wa kiwi kiwa da sdang wow pynbaad ya kiwa yahkhmat ka Party wym ap ki yeiwa ong ki wei wow pynbait yeiwa da bakla ka Party.
U Adelbert toh uwa da psiah cha ka VPP chwa ka Election MLA ha u 2023 tangwa da sang u wow sñiaw wym ap ka Party ya oo nadooh ki pyrtuid wa da tyrwa u wow man kam ki kyrtong MDC na Mawkhar-Pynthorumkhrah wa Jaiaw cha ka KHADC.
Ha ini i Video wa da pynmih da emlang waroh 6 ngut.
Neiliang uwa e ktien ka VPP, u Batskhem Myrboh da pynche u yeini deiwa ong toh du i pyrchang donhi wow pyntlot ya ka Party chwa ka Election.
Da khana u wa u President ka VPP, u Ardent Miller Basaiawmoit da yoh u ya ka chithi na kani ka liang wa yahkhmat u Adelbert ha ka 4 tarik uni u bnai kiwa da dawa wow yachemlang yow yaklam heiwa da dawa leh na ka Party wow paan maap ko na ki paidbah ya iwa da kam ki toh iwa da lehbakla.
Wei hadien wym yoh laad wow yachem wa kini neidaw wa joor boonkaam wa em ka Election JHADC wa KHADC, kini ki bru da pynmih ki da ka Video wa tbian deiwa maham wow pynmih da kawa jrong wot hadien wa u General Secretary uwa man leh kam u MP ka Party, u Ricky AJ Syngkon da pyrchang u wow kynjoh ktien yow yaklam wa ki.
U Batskem Myrboh da pynche u leh wa kini toh ki kaam pohyung ka VPP wei dadep u yaklam ki hapoh ka State Executive Committee.
Da ong u leh wa da em kiwa yahkhmat ka NPP kiwa da tip chaphang ini wei da yaklam ki leh heipor wa lai yalap Election wei ini toh chwa wow mih ini i Video.
Chooh chooh da ong u wa kitu kiwa kyrchaan ya u Adelbert toh kiwa dooh Ticket wow yaleh MDC na ka VPP. Deiwa pynbaad leh ya u Adelbert wa man-i-por pyrchah u ya kiwa boon ki rai wa chim ka Party nadooh i pynkrehkaam ya ki MLA Scheme, i jied ya u Syngkon kam u kyrtong MP wei hadooh i wanrah ya ki Private Bill hapoh ka yung dorbar chna aiñ ka jylla hadooh wa da dai sarom u pyn da oo ya oo hi hapoh Assembly neibhah wot ki MLA ka Party leh ym em kyrchaan ki ya kini ki Bill u.
Da ong u leh wa u Adelbert da leh u samen hi heiyatoh waka Reservation Policy, wot hawa ka Party da thung ko da u Airpeace Well Rani wa u Batskhem Myrboh yow yahkhmat yei yaklam.
Da pynche u leh wa hanla em ini waroh, ka Party dang man ko kawa yatylli wei ym em leh pynchitom ya u Adelbert deilang kiwi kiwa em wa oo.
Discussion about this post