Khliehriat: Ynne ka sngi hadien wa sdang yakhih ka Joint Action Committee (JAC) deiwa pynuiñ ya ki truck wa kit mar na ki karkhana pynmih khyndaw-bilat, neiliang u DC ka District, u E. Kharmalki da khut u ya ka yalang wa jhan ya ka JAC wa ka All Jaiñtia Cement Manufactures Association (AJCMA) kawa man ka seiñ ki karkhana pynmih khyndaw-bilat ha yung krehkaam yong oo.
Ha ka yalang hapyrdi ki ar liang da emlang leh u ADC ka District, u SS Syiemlieh wa kiwa kitkaam kini ki ar liang (JAC wa AJCMA) heiwa neiliang ki bor District da kyntu ki ya ki ar liang wow yasuk noh wei wa ka JAC leh u sangeh noh ko yei yakhih yong ka.
Hadien wa kut ka yalang hawa yaklam wa u President ka AJCMA u RK Pareek da ong u wa ki karkhana da bait ki wow su yei dor bai kit mar wa da booh ka sorkar lyngba ka chnat Transport.
Da pynrap u leh wa ini i dor wa thymme u krehkaam i toh du hapoh u pood u ang ka jylla donhi wei ymye u pynkrehkaam ya i jooh i dor cha kiwi tawon ki jylla.
Chooh chooh da ong u leh wa i dawa ka JAC toh man i iwa ymye u pdiang neibhah wa kwah ki wow pynkrehkaam ya ini i jooh i dor cha baar ka jylla wei lada khriñ yeini i dor cha baar ka jylla daw chem chitom bha ki wow pynkrehkaam ya ki karkhana yong ki.
Neiliang u Nehemayah Tyngkan uwa man kam u Chairman ka JAC da ong u wa dei chimkhia u DC hajrong ini i kaam, ynne ka sngi da khut u ya ka yalang heiwa da kyntu u ya ka JAC wow sangeh ko yei yakhih yong ka wei wa da kular u leh wow pynmih ya ka hukum wow ong wa ini i dor u krehkaam i du hapoh u pood ka jylla wei lada ki karkhana ym bood ki ya kani ka hukum ka JAC ye ko wow pteiñ biang yei yakhih yong ka.
Da pyntip u leh wa ka JAC hadien ka yalang wa u DC da chong pyrkhat ko yeini wei da rai wow sangeh noh chwa yei yakhih weiwa lada ym pynkrehkaam yei dor wa da booh ka sorkar neiliang ka JAC daw sdang yakhih biang ko nadooh ka 7 tarik heipor 10:00 i step.
Heiyatoh wa i dor cha baar ka jylla da ong u wa hajrong ini ka Committee daw chong pyrkhat ko hadien wa krehkaam i dor wa da booh ka sorkar.
