Sdang phooh phieñ ka chnong Jowai

Kam chibynta i pynkhooid wei pynmiat dur ya ki le tylli ki sor ka jylla Meghalaya kitæ ka Shillong, Jowai wa Tura, neiliang ka sorkar jylla da pynbna ko wow pynman da ka yakob wow pynmiat dur ya ki dong ki chnat kini ki le chnong deiwa khut ya ki dorbar chnong wow chimbynta ki ha ka yakob wa da e pyrtuid kam ka Locality Beatification & Enhancement Competition kawa da pynbna ha u Naikhynde 2021 da ka chnat Tourism iwa man leh kam chibynta i lehkmen dap 50 snem ka jylla.

Ha kani ka pynkhooid pynmiat dur ya ki chnong ki thaw da booh kyndon wow pynchna pynmiat ya iwa da rim, iwa da sih, wow puchara, wow niam rong, i dro dur pynmiat, u pynman ya i pynkhooid chnong, i booh ya ki thaw pynlang jhep wei wow pynmyllien yei lehkhooid kamjooh leh yow em i sñiawsarong wa i kitkhlieh ya jar jiar ki chong ki dong.

Neiliang ka sorkar da yarap poisa ko leh yow ye u leh yeini iwa da kheiñ katkam i heh ki dong iwa da chim rai da jar jiar ki DC.

Na waroh kini ki le chnong daw jied mar 3 tylli ki dong kiwa da lehbha dooh wow pynmiat pynkhooid heiwa kiwa jop hadien wa dep bichaar ye ki wow yoh T. 5 lak hadooh T. 10 lak iwa chong katkam wa heh ka dong.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kamtæ na ki dong wa em ha Jowai kiwa da wan chakhmat wow chimbynta da em ki 8 tylli kitæ ka Lumpariat, Dongmihsngi, Mookyrdup, Carolin Colony, New Hill, Mynthong, Dulong wa Iongpiah.

Hawa yoh u yaklam wa ki Waheh Chnong wa ki Secretary Chnong da pyntip ki wa i kreh da lai i chakhmat la kamwa ar tayaw hadien wa yoh ya ka bhah wa nyngkong naka sorkar kawa T. 65,000 wei waroh ka poisa daw man ko T. 1,30,000 hadien wa yoh ya ka bhah wa ar.

Ha Mynthong da dep ki wow pynman ya ka pynkhooid chnong ha ka 15 tarik uni u bnai heiwa da pynkhooid leh ya ka Park wa em hajan i thaw sah u DC, Jowai kawa da tymmoh da i khloo, da niam rong leh ya ki luti ki syngkieñ wei da dro leh ya ki dur ha ki chram wa emlang wa ki khubor wow yait na ki drugs wei da booh leh ya ki Signboard wow pdiang sñiawbha ya ki bru cha ka chnong.

Ha Dongmihsngi da dro ya kiwa boon jait ki dur wa ha rukom kiwa em deilang ka khubor wow kheiñkor ya ka puræ puthi, u man kiwa lehkhooid, u deiñ ya ki Mask wa iwa pynyoo yei mahajon ka spah rymaw kamjooh ka dustur riti. Neiliang u Waheh Chnong da pyntip u wa ya ki dur da riñdur pyn da ki khynroo hi ka chnong wei dang man ki kiwa lai chakhmat kamjooh wow pynkhreh ya kiwa dang sah.

Sa kawi ka dong kawa da phooh da phieñ bha toh ka Lumpariat kawa da booh hadooh ki kchu syntu deiwa wah tymbud luti wa da thied da ka chnong katwa ki syntu da thung da jar jiar ki yung. Ya ki chram leh da e rong bha wei da dro leh da ki dur wa boon jait wei heini leh i kreh dang lai ko chaphrang.

Ha Carolin Colony leh da leh ya ki puchara wa i dro dur ha ki chram katwa ha kiwi da pynman yei puchara wa i niam rong katwa ha Iongpiah da pynkhreh ki wow chna da ka Park.