Ynne ka sngi i dawai tika wow yada na u COVID-19 ya iwa da chna ha Russia, i Sputnik V da sdang poi i ha Hyderabad, Telangana, India wow sdang pynemkaam noh hapoh ka ri.
Waroh i Sputnik V wa da wanrah ynne ha Hyderabad da em i 1.5 lak sien (Dose) wa ye u e.
Katkam wa man katni, hapoh ka ri da e ar tylli ki tika iwa kynthup ya i Covishield wa Covaxin wei hadien wa yohbor na ka Drug Controller General of India (DCGI) daw sdang pynemkaam noh sa ini i dawai na Russia.
Neiliang u Ambassador ka Russia ha India, u N. Kudashev da ong u wa kini ki ar ri da kreh ki chirup pyrchah ya kani ka khlam COVID-19 wei i poi ini i dawai daw yarap bha i chiboon wow yakhun pyrchah ya kani ka la-ær wa ar yong kani ka khlam.
Ya i Sputnik V da chna da ka Gamaleya Research Institute yong ka ri Russia wei hapoh India daw pynmih ya ini i dawai da ka Dr. Reddy’s Laboratories.
Kam wow pynkynmoo heini, ka Russian Direct Investment Fund da ong ko wa ha ka chi snem daw pynmih hadooh 850 Million Dose i Sputnik V hapoh ka India.
