Kiwa yalehke na kylleiñ ka jylla da sdang ki wow poi ha Shillong kam chibynta wow chimbynta ha ka 4th Meghalaya Games 2022 kiwa daw chimbynta ha ki 19 tylli ki jait yalehke kiwa dadep pynkhreh bha yow pynyoo yei sap wei wow rah burom ya jar jiar ki District wa ki chnong ki thaw yong ki.
Ka yalang wai pyrda ka Meghalaya Games daw pynman ha ka 3 tarik ha First Ground, Polo, heipor 10:00 waje i step tangwa ki yakob Gymnastics wa Basketball daw sdang ki nadooh mynstep heipor 10:00 waje i stap ha ka Sports Authority of India Training Centre wa ha NEIGRIHMS. Katwa ka Billiards & Snooker da sdang ynne ka sngi ha Shillong Club.
I pynkhreh ya ki yalehke Gymnastics da lai i chakhmat deiwa pynkylla dur ya ka SAI Indoor Stadium neibynta wow leh ya ka Vault, Balance Beam wa kiwi de iwa man leh i sien wa nyngkong wa da pynman ya ki yakob Gymnastics ha ka Meghalaya Games.
Ya ka yalehke Basketball daw pynman ha ka Basketball Court ka NEIGRIHMS kawa da chna kyrpang bha heiwa ka West Khasi Hills daw yada ko yei naam Champion ha ki kyrdan chynrang wa kynthai.
Ka yalehke Basketball wa nyngkong toh hapyrdi ka North Garo Hills wa Ri-Bhoi yong ki chynrang.
Kamtæ da pynchlur ya ki paidbah wow wan paitke ki heiwa ym hap wow su bai psiah.
