Ka China ha kani ka tayaw wa dadep da pynlait ko ha iwi i Video iwa pynyoo yei yakhun da ki kti hapyrdi ki chipai ka People’s Liberation Army (PLA) wa ka Indian Army ha Galwan Valley wa em ha thaaiñ mihsngi ka Ladakh ha u Naiynru u snem wa dadep.
Ha ini i Video wa da pynmih ka China yow pynyoo wa ka toh kawa khlanbor ha ini i wa jia, da yoo ya uwi u Captain ka Bihar Regiment, uwa na Senapati District ka Manipur uwa yahkhmat ya ki chipai ka India wow beh ya ki chipai ka PLA.
Uni u Captain da yoh u ya ka Mention in Despatches ha ka Republic Day yong uni u snem hadien ki kaam wa chlur yong oo da yoo wa yahkhmat u wow tia cha ki PLA khlem kiwon kiwon ki tiar yaleh.
Ini i Video da poor bha i ha India, neiliang ka ri won da kdaw ki yei chlur ki chipai ka Indian Army wow yaleh wow yada ya ka ri.
Ini i Video wa pynlait ka China, da pdiang ko leh wa da dooh ko ya ki chipai yong ka 4 ngut ha i yakhun pyrchah ya ki chipai ka India ha ka 15 Naiynru 2020 ha Galwan Valley heiwa ka India da dooh ko ya ki 20 ngut ki chipai yong ka.
