Jowai: Neiliang ka sorkar pyrdi neipor cheipor pynmih ko ki hukum wow khang sbak ya u pood ka ri wei wot ynnin leh u montri ki kaam pohyung ka ri, u Amit Shah da hukum u ya ki chipai ka BSF wow pynjoor yei sonteri ya u pood u ang ka ri wa kiwi tawon ki ri kam ka Bangladesh, Nepal wa kiwi kiwi.
Hei sakhiat won hanlada khang yei psiah i mih ha u pood wa ka Bangladesh dang em hi ki damok na Bangladesh kiwa psiah chapoh ki chnong wa em ha khappood.
Yeini da pynsakhiat da u waheh chnong ka Dawki, u Mankhraw Ryngksai uwa da pyntip wa hanlada da thung ya ki dkhot VDP ka chnong wow sonteri ya u pood wa ka Bangladesh chirup wa ki BSF wa ki pulit kattæ leh dang em ki damok kiwa psiah tooh chapoh ka ri (India) dei thmu wow tooh na ki yung bru wei ini da man i iwa joor khamtam ha kini ki 2-3 sngi wa dadep.
Ka Dawki wa ka chnong Bakur man ki ki chnong kiwa ympu em u kær naar chieh wa ka Bangladesh wei i lai i wan man i iwa dang suk bha ya ki bru khamtam heipor miet.
Chooh chooh yeini da pynsakhiat leh da kiwi kiwa chong chnong ka chnong kiwa da ong wa da haap yang miet ki katni neidaw wa da sdang boon biang ki damok wa psiah chapoh ki chnong dei thmu wow tooh.
Kam wow kdaw heini ka Bangladesh hadooh ynne ka sngi da em kamwa 400 tam ngut wa yoh ya uni u khñiang wei da em leh 27 ngut kiwa da yap na u COVID-19.
Ynnin wot u Lamphang ka yung dorbar chna aiñ ka jylla, u Metbah Lyngdoh leh da ebuit u ya u montri rangbah ka jylla, u Conrad Sangma wow khang sbak chwa chipor ya waroh ki yaw kiwa em ha ki khappood yong ki jylla kynthup wa kiwa em wa ka ri Bangladesh khnang wow yada na kani ka khlam.
Kattu emkaam bha wa ka sorkar u chimkhia ko yeini i psiah tooh ki bru na Bangladesh khnang wa i yakhun pyrchah ya ka khlam u COVID-19 u man ko kawa jop.
Waheh Chnong ka Dawki, u Mankhraw Ryngksai
Discussion about this post