Hadien wa u Symbood Montri Rangbah ka sorkar jylla, u Sñiawbhalang Dhar ini wa dep da kular u wow pynyoh T. 25 klur ka mang poisa sorkar neibynta u chna yei emkaam ha madan Kiang Nangbah Stadium, Jowai, kamtæ ynne ka sngi da sdang pynyoo dak u yei kular wa oo da khlai u deiwa hiar li pait li sylli ya kani ka madan chirup wa u Commissioner and Secretary ka chnat Sports and Youth Affairs ka sorkar jylla, u Dr. Vijay Kumar D, IAS.
Da emlang leh ha kani ka sngi wa u District Sport Officer ka West Jaiñtia Hills District, u Khroobok Passah, ki dkhot ka West Jaiñtia District Sport Association (WJDSA) wa kynthup ya u EMH Passah, Working President, u Patrick Lamare, Vice President, u Lamat Oo Laloo, General Secretary wa kiwi ki dkhot.
Hadien i pait i sylli, neiliang u Sñiawbhalang Dhar da khana u wa ini i wan u toh kam chibynta u pynkhreh ya ka Detail Project Report (DPR) chwa wow yoh ya ka mang poisa kawa oo da dep kular paidbah u ini wa dep.
Kam u pynkynmoo, i kular u Sñiawbhalang Dhar neibynta kani ka Stadium toh heipor wa klam u kam u kongsan haka sngi pynkut ka WJDSA yei lehkmen dap 50 snem yong ka ha ka 23 tarik u bnai wa dep.
