U loom Taal uwa em hajan ka nongbah Manila yong ka Philippines uwa da khlai diñ nadooh ka 12 tarik uni u bnai, ynne ka sngi ki bru chemphang ka sorkar namo ki Seismologist da pyntip ki wa da sdang ran sdang duna i khlai diñ uni u loom.
Nadooh wa sdang khlai diñ u Taal da chah ktah da ki phaw hajar ngut ki bru khamtam kiwa sah hajan yong oo heiwa da haap yut ki na ki yung yong ki.
Hanlada ran namo duna ini i khlai diñ u Taal, ki bor sorkar da kyntu ki ya ki paidbah wympu toh u kheiñstiñ namo u tia ki chajan yong oo.
Ynnin wa ynne ki paidbah wa sah ha ki yung wa em hajan u Taal da sdang uiñ biang ki cha yung wow sylli yei chah ktah ki yung ki ha ini i jia heiwa boon na ki yung da chah tymmoh ki wei em leh kiwa da oor na ki khmi wa khih neibor wa kyan u loom Taal.
I tpai da tymmoh i ym du ya ki yung tangwa wot ya ki sarok wei ki pulit dang khang pyrchah ki ya ki bru wow liwan biang cha ki yung yong ki.
Uwi na ki heh pulit ka Agoncillo, u Capt. Danilo Manalo da ong u wa hanlada da sdang ran i khlai diñ uni u loom tangwa dang khang ya ki bru wow lai ki chajan neidaw wa rben ware i tpai wei dang khih hi ki khmi neidaw i bor yong uni u loom Taal.
Discussion about this post